DILI, 03 marsu 2022 (TATOLI)— Primeiru Ministru, Taur Matan Ruak, hateten veteran-sira iha papél importante atu kontribui ba pás, estabilidade no dezenvolvimentu iha Timor-Leste.
Xefe Governu hato’o kestaun ne’e bainhira sai oradór ba komemorasaun loron 3 marsu, nu’udar loron Nasionál Veteranu sira nian, atu hanoin hikas veteranu sira ne’ebé sakrifika sira nia an hodi luta ba ukun rasik an.
Infelizmente ba tinan ida ne’e, Governu deside la selebra tanba konsidénsia ho festa demokrásia, hanesan kampaña no eleisaun Prezidensial nian, nune’e aproveita loron espesiál ida ne’e, Xefe Governu hala’o palestra ida ba Ofisiál, Sarjentu no Prasa F-FDTL nian, kona-ba importánsia loron ida ne’e.
Iha palestera ne;e, Xefe Governu fahe esperiénsia kona-ba tátika gerilla FALINTIL nian, kona-ba oinsá halo funu, funu oinsá, oinsá manán, dalan/estratéjia saída mak uja hodi manán, atu bele sai referénsia lisaun ba jerasaun foun sira iha F-FDTL ne’ebé la mai hosi gerilla, atu nune’e bele hatene istória FALINTIL nian ne’ebé ikus mai nakfila sai Forsa Defeza, hodi iha lori F-FDTL ba oin nu’udar Forsa Defeza Estadu nian ba mantein integridade territoriál.
“Ha’u aproveita oportunidade ne’e halo pedidu ida ba Ministru Defeza no Xefe Estadu Maiór Jenerál Forsa Armada, para organiza palestra, enkontru oan ida ne’e para fahe informasaun papél Veteranu sira nian iha dezenvolvimentu nasionál, mas ha’u troka liu kona-ba esperiénsia militár sira, oinsá ita halo funu, funu oinsá, oinsá ita manán, dalan saída mak ita hetan hodi manán, entaun fó pasa referénsia lisaun sira ne’e ba ita-nia ofisiál superiór, Sarjentu, Prasa sira, para sira entende uitoan buka referénsia sira ne’e hodi hatene ita-nia istória, tanba ita-nia istória mak ita hetan forsa la’o ba oin enfrenta dezafiu no difikuldades iha oin,” Xefe Governu hatete ba Jornalista sira iha hafoin ramata fó palestra iha Kuartél Jenerál Fatuhada, kinta ne’e.
Tanba ne’e, Xefe Governu afirma, veteranu sira uluk halo papél importante mak harii nasaun ida livre no independente, no iha prosesu dezenvolvimentu nasionál veteranus sira nia papél ida tan mak oinsá mak kontribui ba pás, estabilidade no dezenvolvimentu nasionál.
“Veteranu sira-nia kontribuisaun iha Konstituisaun rasik hateten, iha lei sira hateten, sira-nia kontribuisaun ida mak oinsá hametin Pás no Estabilidade iha ita-nia rain, kontribuisaun ida seluk mak oinsá ajuda dezenvolvimentu iha ita-nia rain apartir mellora ne’ebé sira halo iha sira-nia vida rasik, hadi’a sira nia padraun vida moris,” eis Xefe Estadu Maior FALINTIL ne’e akresenta.
Eis Prezidente Repúblika ne’e afirma, prosesu dezenvolvimentu nasionál, hanesan mós luta ba ukun rasik an, presiza esforsu, sakrífísiu no pasiénsia foin bele atinje, tanba dezenvolvimentu sei la mai fó iha bandeja, tanba ne’e kontribuisaun ema hotu-hotu nian importante ba bem estar.
La haluha, Xefe Governu mós fó omenajen ba veteranu sira ne’ebé husik ona mundu ne’e no saudasoen espesiál ba sira hirak ne’ebé sei moris, ba dedikasaun no sakrifísiu ba harii RDTL.
Iha biban hanesan Vise Xefe Estadu Maiór Jenerál FALINTIL Forsa Defeza Timor-Leste (F-DTL), Maijór Jenerál Calisto dos Santos Coli ‘Coliati’, hateten ohin loron komemorasaun veteranu nian ba dala lima atu fó omenajen ba veteranu sira, kombatente no martír sira.
“Ita ohin halibur malu iha ne’e ho úniku objetivu mak atu fó omenejen ba ita nian veranu sira liuhosi sira nian sakrifisiu ne’ebé fó sira nia vida hodi liberta rai ne’e ba independensia,” Coliati akresenta.
Vise Xefe Estadu ne’e mós agradese ba Primeiru Ministru nia presenza iha komemorasaun loron veteranu liuhosi fó palestra ne’e atu enkoraja militár foun sira atu banati hodi serbí estadu no povu.
“Primeiru Ministru hanesan mós veteranu ida bele partilla ba ita nian jerasaun foun kona-bá istória funu libertasaun nasionál nian to’o ukun aan, hodi sira bele kontinua karik hetan responsablidade,” Coliati agradese.
Entertantu, palestra ho tema a importancia do dia nacional veteranus, 3 de marsu dala-lima ne’ebé hala’o iha Kuartél Jenerál F-FDTL Fatuhada, kinta ne’e orador úniku mak Primeiru Ministru, Taur Matan Ruak, ne’ebé akompaña hosi Ministru Defeza Filomeno Paixão de Jesus, Vise Xefe Estadu Maiór Jenerál FALINTIL Forsa Defeza Timor-Leste (F-DTL), Majór Jenerál, Calisto dos Santos Coli ‘Coliati’ no Xefe Estadu Maiór Jenerál FALINTIL Forsa Defeza Timor-Leste (F-DTL), Komodoro Pedro Klamar Fuik no membru F-FDTL sira.
Jornalista: Natalino Costa
Editór : Florencio Miranda Ximenes
