LIQUIÇA, 04 marsu 2022 (TATOLI)— Diretór Komisaun Nasionál Eleisaun (CNE, sigla Portugés) munisípiu Liquiça husu ba inan-aman sira labele lori labarik minioridade bainhira hakarak tuir kampaña prezidensiál tanba sira nia tempu seidauk to’o iha vida politika, maibé sira-nia tempu atu aprende no estuda.
CNE observa kandidatu Prezidente Repúblika períodu 2022 to’o 2027 hamutuk na’in-16 hala’o kampaña eleitorál iha antusiazmu makas hosi ema hotu partisipa hodi rona direta programa sira ne’ebé kada kandidatu hato’o.
Notísia relevante: Semana dahuluk, CNE rejista irregularidade iha kampaña eleitorál
“Maibé, ami observasaun iha momentu labarik barak mak partisipa, maske lei bandu katak labarik kiik sira labele partisipa iha kampaña. Nune’e ami husu ba inan -aman sira tau konsiderasaun ba hahalok sira hodi lori labarik tuir sira mai kampaña,” Diretór CNE munisípiu Liquiça, Celestiano Xavier hateten ba Agência TATOLI, sesta ne’e.
CNE Liquiça nafatin fó hanoin no fó informasaun envolvimentu labarik ne’e ba parte komponente ne’ebé haree direitu ba labarik nian atu sira mós bele toma responsabilidade.
“Atu fó xamada atensaun ba inan-aman katak bainhira lori labarik mai partisipa kampaña mak iha akontese buat ruma familia sira sente oinsá. Maibé família balun dehan ami-nia oan hakarak tuir ami la’ós ami mak obrigada,” nia akresenta.
Nune’e, CNE Liquiça nafatin sosializa informasaun sira ne’e liuhusi rádiu komunidade liquiça katak labarik minoridade labele partisipa iha kampaña polítika tuir sira nia hakarak rasik no ema ruma mak organiza.
Notísia relevante: INDDICA observa labarik barak maka asiste iha kampaña
Jornalista : Felicidade Ximenes
Editór : Florencio Miranda Ximenes
