DILI, 09 marsu 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova Projetu Rezolusaun Governu kona-ba fornesimentu donativu ho valór millaun $1,5 ba programa ai-han mundiál Nasaun Unida (WFP, sigla inglés) atubele kontribui ba ajuda umanitária ba povu ukranianu.
“Konsellu Ministru aprova donativu ne’ebé Timor-Leste sei fó ba programa alimentár hodi ajuda sira-nia operasaun hodi responde ba situasaun krize no umanitária iha Ukránia,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Portavóz Governu ne’e akresenta, situasaun ne’ebé akontese agora iha Ukránia sai preokupante ba entidade hotu no Governu Timor-Leste manifesta-nia preokupasaun ho situasaun umanitária.
Tuir dadus hosi Nasaun Unidada, ema hamutuk millaun 1,25-resin maka afeta hosi konflitu ne’e no halai sai hosi país hodi hamosu krize umanitária ne’ebé boot iha Europa, hahú hosi funu mundiál daruak.
Jornalista : Antónia Gusmão
Editora : Julia Chatarina