HEADLINE, LEI, NASIONÁL

CAC sosializa Lei Medida Prevensaun Kombate Korrupsaun ba ANC

CAC sosializa Lei Medida Prevensaun Kombate Korrupsaun ba ANC

Sosializa Lei Medida Prevensaun Kombate Korrupsaun ba entidade ANC, iha salaun ANC, Caicoli, kinta (10/03). Imajen TATOLI/Egas Cristóvão

DILI, 10 marsu 2022 (TATOLI)—Komisaun Antí-Korrupsaun (CAC, sigla portugés), kinta ne’e, halo sosializaun lei númeru 7/2020 kona-ba Medida Prevensaun no Kombate Korrupsaun ba Autoridade Nasionál Komunikasaun (ANC, sigla portugés).

Komisáriu CAC, Sérgio de Jesus Costa Hornai, hateten, ohin ekipa responsável ne’ebé toma konta ba Deklarasaun Rendimentu Bens Interese (DRBI), fó biban ba instituisaun Estadu, liuliu autoridade kompotente admininistrativu no supremu inklui CAC rasik, atu kargu xefia iha liña ministeriál no instituisaun direita ka indireita Estadu halo rejistu DRBI.

Komisáriu CAC, Sérgio de Jesus Costa Hornai. Imajen TATOLI/Egas Cristóvão

“Objetivu konvite ne’e atubele mai halo diseminasaun informasaun relasiona rejime Deklarasaun Rendimentu Bens Interese ba funsionáriu ANC ninian, hodi nune’e ita-nia kargu xefia sira ho ninia membru agregadu familiár sira bele rejista deklarasaun ba rikusoin sira ne’ebé iha,” Komisáriu CAC hateten, iha salaun ANC, Caicoli.

Notísia relevante: Lei MPCC, kargu xefia aprezenta deklarasaun rikusoin

Objetivu deklarasaun ne’e atu hametin integridade no konflitu interese sira, atubele haree kada servidór Estadu nia rikusoin ne’ebé akumula durante mandatu.

“Nune’e mós, ba funsionáriu sira ne’ebé hala’o serbisu funsionál tanba razaun serbisu kompleksu balun, entaun sira mós sempre halo interesaun ho komunidade, liuliu iha kontratasaun públiku, aprovizionamentu, investigasaun no tributáriu. Sira ne’e sei halo deklarasaun maski sira la kaer kargu, maibé sira sei presta deklarasaun ba autoridade kompetente hanesan CAC,” nia dehan.

Nune’e, bainhira sira atu rejistu ba funsionáriu iha nível diretór, xefe departamentu no mós funsionáriu sira ne’ebé serbisu iha aprovizionamentu, kontratu, no serbisu investigasaun kriminál ninian hotu sei aprezenta ba CAC.

“Daudaun ne’e ita hahú halo rejistu instituisaun Estadu hanesan Prezidénsia Repúblika, Prezidente Konsellu Ministru, Ministériu Asuntu Parlamentár Komunikasaun Sosiál, no seluk tan. Ita halo rejistu to’o konklui ba ita-nia instituisaun sira ne’ebé ita arola ona hamutuk 102,” nia akresenta.

Iha biban hanesan, Prezidente ANC, João Olívio Freitas, konsidera inisiativa ne’e importante tebes tanba lei ne’e vigór ona, entaun durante implementasaun, servidór Estadu sira tenke hatene kona-ba kontíudu lei ne’e rasik inklui implemetasaun.

“Entaun ohin ita konvida CAC mai fahe koñesimentu nesesáriu kona-ba lei ne’e rasik, kona-ba implementasaun no dever servidór Estadu ne’ebé atu kumpri no hakerek ona iha lei nia laran rasik,” João Olívio Freitas, tenik.

Tanba ne’e, atu ninia implementasaun lei ne’e la’o di’ak, ANC tenke iha koñesimentu kle’an hodi nune’e bele tulun durante prosesu implementasaun.

“Entaun atubele implementa no asegura  lei ne’e ho di’ak, ita konvida CAC mai halo diseminasaun ba sistema ne’e rasik, nune’e bainhira implementasaun iha tinan kotuk, ANC kompleta ona formuláriu ne’ebé komisaun haruka mai ita hodi hakerek naran funsionáriu sira ne’ebé okupa pozisaun iha ANC,” nia dehan.

Iha semana kotuk ANC hetan komunikasaun hosi CAC atu haree filafali lista naran sira tanba iha mudansa funsionáriu balun ne’ebé okupa pozisaun hanesan diretór no xefe koordenadór sira hamutuk na’in-sia, maibé jeralmente funsionáriu tomak hahú  hosi konsellu administrasaun to’o mai funsionáriu tékniku sira hamutuk 42.

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!