OÉ-CUSSE, 13 marsu 2022 (TATOLI) – Kandidatu Prezidente Repúblika ba períodu 2022-2027, José Manuel Ramos Horta, promete sei serbisu hamutuk ho Governu hodi haforsa liután investimentu diplomátika nune’e haluantán kooperasaun iha nível internasionál.
Kandidatu ho númeru sorteu 14 ne’e akompaña hosi Prezidente Aartidu CNRT, Kay Rala Xanana Gusmão, domingu ne’e hala’o kampaña aberta ho tipu komísiu iha kampu futeból Oébau sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
Nia dehan, juventude-sira tenke asesu ba edukasaun ho kualidade, asesu formasaun tékniku profisionál, iha futuru Timor-Leste sei adere ba membru ASEAN, entaun juventude tenke iha kualidade hodi envolve iha kampu traballu.
“Hanesan odamatan atu fó empregu ba joven-sira ba li’ur, ba li’ur la’ós manán osan maibé ba aprende mós, entaun durante tinan-lima ha’u serbisu hamutuk ho Governu atu halo investimentu diplomátiku maka’as,” José Ramos Horta, ko’alia iha kampaña ne’e.
Nia kompromete, bainhira hetan fiar hosi povu ba Prezidente Repúblika, sei serbisu hamutuk ho Governu atu kualifika Zona Ekonomia Espesiál Sosiál Merkadu (ZEESM), tanba tuir estatístika hosi Organizasaun Nasaun Unidadas (ONU), Timor-Leste espesialmente RAEOA asumi nível pobreza aas.
“Karik ha’u hetan fiar sai xefe Estadu, sei serbisu hamutuk ho Governu atu haree didi’ak fali, dezenvolvimentu ba estratéjika polítika ekonomika ba Oé-Cusse nian, polítika hotu-hotu tenke tane hosi povo bazea ba povu nu’udar ema ser umanu, polítika ekonómika nia rezultadu, kosok oan-sira tenke iha nutrisaun di’ak labele hamlaha, bee-moos tenke to’o baze, hadi’a inan-feto sira -nia moris,” José Ramos Horta promete.
Diretór Komisaun Nasionál Eleisaun (CNE, sigla portugés), Tomás Oqui Meta, informa, monitorizasaun ba kampaña kandidatu prezidente repúblika períodu 2022-2027, iha Oé-Cusse la’o di’ak no hakmatek, maske iha domingu iha kandidatu maibé militante no simpatizante-sira hatudu maturidade polítika di’ak iha ámbitu kampaña.
“Ohin iha Oé-Cusse kandidatu rua mak hala’o kampaña ho oras hanesan, kandidatu númeru sorteiu 16 ho kandidatu númeru sorteiu 13, maibé ita haree situasaun la’o kapaas no hakmatek no laiha irregularidade,” nia katak.
Nia fó-sai katak, kandidatu-sira kumpre oráriu kampaña ne’ebé fó-sai ona hosi órgaun eleitorál, nomoos kandidatu-sira aprezenta kompromisiu eleitorál, tuir vizaun no misaun prezidente repúblika, hodi hato’o mensajen ba povu atu kria pás no estabilidade hodi kontribui fó susesu ba festa demokrasia iha Timor-Leste.
Jornalista : Abílio Elo Nini
Editór : Evaristo Soares Martins
