LIQUIÇA, 14 marsu 2022 (TATOLI) – Ofisiál Supervizaun Komisaun Nasionál Eleisaun (CNE-sigla Portugés), Júlio de Carvalho, hateten hahú 02 to’o 14 marsu, kampaña Prezidensiál ba kandidatu na’in-16 halo iha munisípiu Liquiça la’o di’ak no laiha problema no violasaun ruma ba lei eleitorál ne’ebé fó sai ona.
“Ohin,kampaña Prezidensiál iha Liquiça termina ona bazeia ba kalendáriu ne’ebé mak iha, tuir observasaun ne’ebé ami halo durante ne’e ba kandidatu sira la hamosu problema ruma entre militante no apoiante sira buat hotu la’o ho normál,” Júlio ba Agência TATOLI iha Liquiça hafoin ramata komísiu kandidatura Prezidente Repúblika, José Ramos Horta, segunda ne’e.
Kandidatura hotu kumpre lei ne’ebé mak fó sai ona hodi hala’o kampaña tuir oráriu ne’ebé mak CNE fó sai ona.
“Kampaña iha ne’e kandidatu hotu kumpre regra ne’ebé mak CNE fó sai ona, ne’ebé ramata sira nia kampaña sira ho susesu,” nia dehan.
Tuir oráriu kampaña ne’ebé aprova hosi CNE ba kandidatura sira hala’o kampaña durante semana rua hahú iha 02 to’o 16 marsu, hodi divulga sira nia programa no vizaun bainhira sai Prezidente Repúblika ba povu hotu iha territóriu nasionál.
Tuir ajenda iha eleisaun Prezidensiál 2022 to’o 2027 sei hala’o iha 19 marsu, mai ne’e ho kandidatu hamutuk na’in-16 mak hanesan, Isabel Ferreira, Hermes Barros, Ângela Freitas, Rogério Lobato, Anacleto Ferreira, Francisco Guterres Lú Olo, Maria Helena Lopes de Jesus Pires, Tito da Costa Cristovão “Lere Anan Timur”, Armanda Berta dos Santos, Antero Benedito, Constáncio Pinto, Virgilio Guterres, Martinho Gusmão, José Ramos Horta, Felisberto Duarte no Mariano Assanami Sabino Lopes.
Notísia relevante: Dirijente CNRT husu apoiante kandidatu PR Horta mantein dixiplina iha kampaña
Jornalista: Hortencio Sanchez
Editór : Florencio Miranda Ximenes
