Eleitór na’in-40 sei vota iha sentru votasaun ambulante ospitál Oé-Cusse

OÉ-CUSSE, 15 marsu 2022 (TATOLI) – Sekretariadu Téknika Administrasaun Eleitorál (STAE), Rejiaun Administrativa Espesiál Oé-Cusse Ambeno (RAEOA), daudaun ne’e simu ona lista eleitór na’in-40 sei ezerse direitu iha sentru votasaun ambulante iha Hospitál Referál Oé-Cusse.

Diretora STAE RAEOA, Luiza da Costa, hateten, STAE simu ona lista hosi parte saúde hamutuk ema na’in-40 atu ezersie direitu votu iha Hospitál Referál Oé-Cusse, tán ne’e STAE hahú estabelese sentru votasaun ambulante atu fasilita pasiente ho família, médiku, enfermeira no parteira atu ezersie sira-nia direitu votu iha loron eleisaun.

“Foin daudaun ne’e ami halo ona koordenasaun ho parte saúde, kona-ba lista internadu sira, parte saúde konsege rejista eleitór provizória hamutuk na’in-40, tanba agora pasiente sira-ne’e baixa hela iha ospitál. Karik to’o loron 17 ka 18 marsu iha pasiente emerjénsia ruma tama tán dadus ne’e sei iha mudansa, tanba dadus foti hosi loron 9 marsu to’o ohin foin mak na’in-40 ne’e,” Luiza da Costa informa ba Agência Tatoli iha Palaban, Oé-Cusse, tersa ne’e.

Nia informa, lista internadu 40 ne’e karik antes to’o loron eleisaun mak alta hosi ospitál atu fila ba sira-nia hela-fatin, parte STAE sei koordena ho servisu saúde rejionál atu komunika ho pasiente-sira hodi nafatin vota de’it iha sentru votasaun ambulante.

Tanba pasiente sira-nia naran alista ona, ne’ebé agora STAE monta ona ekipa brigadista hosi sentru votasaun Mahata, suku Costa maka sei atende-sira iha ospitál.

“Sentru votasaun ambulante ne’e, sei apoia seguransa hosi PNTL no observasaun hosi Komisaun Nasionál Eleisaun (CNE, sigla portugés), observadór internasionál no fiskál hosi kandidatu na’in-16,” nia katak.

Daudaun ne’e ekipa STAE prepara ona karreta 36, karreta aluga 10, apoia hosi Governu 26, hodi transporta materiál sensitivu no la’ós-sensitivu iha loron sesta 18 marsu hafoin halo abertura atu desloka ba sentru votasaun 60 no estasaun 88 iha suku 18 iha sub-rejiaun haat.

Totál eleitór ne’ebé sei partisipa iha eleisaun prezidensiál 19 marsu 2022, iha RAEOA hamutuk 51.495 komposta hosi mane 26.232, feto 25.263, ho totál sentru votasaun 60 no estasaun votasaun 88, ne’ebé sei envolve brigadista na’in-60 no ofisiál eleitorál na’in-880.

Jornalista   : Abílio Elo Nini
Editór         : Evaristo Soares Martins