OÉ-CUSSE, 16 marsu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano orienta Diresaun Rejionál Infraestrura (DRI), hahú instala fasilidade iluminasaun ho bee-moos iha sentru votasaun 60 no estasaun votasaun 88 hodi apoia prosesu eleisaun prezidensiál períodu 2022-2027 iha rejiaun ne’e ho susesu.
Diretór Diresaun Rejionál Infraestrutura RAEOA, Kandidu dos Reis Amaral, hatete, hafoin simu pedidu ba lista sentru votasaun ne’eb’e sedauk asesu ahi no fasilidade seluk, prezidente autoridade RAEOA orienta kedan DRI hodi organiza departementu Eletrsidade de Timor-Leste (EDTL) ho departementu Servisu Água Saneamentu (SAS) hamutuk ho Institutu Jestaun Ekipamentu (IJE) prepara tun ba baze desde inisíu marsu ne’e.
“Maibé ita la garante ba estrada tanba kondisaun udan, ba ahi no bee-moos ekipa sira ne’ebé destaka iha sub-rejiaun, sira esforsu ona halo servisu ne’e iha ona rezultadu di’ak, tanba ne’e eventu nasaun nian, presiza ahi no bee atu fasilita servisu iha apuramentu iha sentru votasaun tenki la’o di’ak,” Kandidu Amaral, informa jornalista sira iha Santa Rosa Oé-Cusse, kuarta ne’e
Nia dehan, fasilidade ne’ebé apoia ba sentru votasaun, hetan aprovasaun hosi prezidente autoridade ho intensaun atu fasilita eleisaun prezidensiál bele la’o ho susesu to’o remata, maibé problema maka estrada balu ladun di’ak tanba udan foin para semana ida, entaun ita nia preparasaun ladun kobre hotu fatin izoladu-sira.
Maibé prioridade liu mak iluminasaun no bee-moos, tanba atu fasilita apuramentu, tan ne’e maka ekipa hosi EDTL fahe ba ekipa haat, desloka ba sub-rejiaun Oésilo, Pásabe, Nítibe no Pante Makasar.
Entretantu, iha RAEOA totál sentru votasaun hamutuk 60 no estasaun votasaun hamutuk 88, ho totál eleitór atu partisipa iha eleisaun prezidensiál períodu 2022-2027 hamutuk 51.459, komposta hosi mane 26.232 feto 25.263.
Notisia relevante: STAE RAEOA identifika sentru votasaun balun laiha liña eletrisidade
Jornalista: Abílio Elo Nini
Editór: Evaristo Soares Martins
