Autoridade RAEOA husu ofisiál eleitorál serbisu imparsiál no responsabilidade
OÉ-CUSSE, 18 marsu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, apela ba ofisiál Sekretariadu Tékniku Administarasaun Eleitorál (STAE) no Komisaun Nasionál Eleisaun (sigla, portugés) atu presta servisu ho imparsilidade no responsabilidade iha ámbitu eleisaun prezidensiál 19 marsu 2022.
Adjunto Prezidente Autoridade RAEOA atuál Sekretáriu Rejionál ba Asuntu Sosiais, Maximiano Neno, hatete, eleisaun prezidensiál nu’udar eventu nasionál, atu hili xefe Estadu nasaun nian, tán ne’e husu brigadista hamutuk ho ofisiál supervizaun CNE hametin liña koordenasaun ho fiskál, seguransa hodi garante serbisu ho responsabilidade iha sentru votasaun.
“Ohin, materiál sensitivu transporta ba sentru votasaun, imi hotu tenke asegura didi’ak materiál sira-ne’e, atu labele iha tentasaun ba buat ne’ebé ema hotu, Estadu no Governu lakohi atu akontese, ha’u husu ba ofisiál sira akompaña didi’ak, husik imi-nia serbisu iha maibé foku ba responsabilidade ne’ebé Estadu fo fiar mai ita, atu lidera servisu iha sentru votasaun ho kualidade,” Maximiano Neno, ko’alia bainhira abertura distribuisaun materiál eleisaun prezidensiál ba sentru votasaun iha salaun Alfándega, Palaban, Oé-Cusse, sesta ne’e.
Nia dehan, eleisaun ne’e nu’udar objetivu povu Timor-Leste nian tanba hakarak eleisaun ne’e la’o ho kualidade, labele akontese problema.
Diretór CNE Nasionál, Adão Soares, kompromete orgaun eleitorál serbisu ho responsabilidade, imparsialidade no independente tuir konstituisaun haruka.
“Kna’ar ida-ne’e todan tebes, tenke kabe ba STAE ho CNE, husu ba ofisiál monitorizasaun ho STAE, ha’u komprometidu tenke hatudu ita-nia responsabilidade, imparsialidade no independente iha prosesu ne’e, haluha servisu iha uma, foku ba ita-nia responsabilidad,” nia apela.
Komandante PNTL RAEOA, Superintendente Xefe Mateus Assunção Mendes, hatete, susesu eventu ne’e iha seguránsa nia-liman, komesa akompaña urna to’o distribuisaun materiál sensitivu no la’os-sensitivu ba sentru votasaun.
“Tán ne’e hosi komandu distritál, prepara membru efetivu 138 no UPF 35 prontu apoia seguransa iha sentru votasaun 60, no ami mós hetan apoiu hosi Batallaun Orden Públika no F-FDTL atu halo monitorizasaun durante loron eleisaun to’o apuramentu, atu garante situasaun hakmatek pás no estabilidade iha rai Oé-Cusse,” Mateus Mendes hateten.
Diretora STAE Oé-Cusse, Luiza da Costa, fó sai katak, dadus ba transporte atu distribui materiál ba sentru votasaun, parte STAE prepara karreta 36, karreta 26 apoia hosi autoridade no aluga karreta 10.
Totál eleitór ne’ebé partisipa iha eleisaun prezidensiál períodu 2022-2027 iha Oé-Cusse hamutuk 51.495 komposta hosi mane 26.232 no feto 25.263.
Nune’e mós totál sentru votasaun hamutuk 60 no estasaun votasaun hamutuk 88, ne’ebé sei envolve brigadista na’in-60 no ofisiál eleitorál na’in-880, no superiviziona hosi CNE na’in-88.
Jornalista : AbílioEloNini
Editór : Evaristo Soares Martins
