VIQUEQUE, 18 marsu 2022 (TATOLI)-–Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE, sigla portugés) Viqueque, sesta ne’e, hahú distribui materiál Eleisaun Prezidensiál períodu 2022-2027 ba sentru votasaun 92 no estasaun votu 110 estabelesidu.
“Ohin ita hahú distribui materiál sensitivu no naun sensitivu ba sentru votasaun no estasaun votu. Ita tenki lori materiál sira-ne’e to’o iha fatin,” Diretór Servisu STAE Viqueque, Humberto da Costa, hateten, iha ámbitu serimónia distribuisaun materiál eleisaun, iha edifísiu administrasaun munisipál, sesta ne’e.
Nia dehan, urna ne’ebé atu distribui hamutuk 330, sei desloka ba fatin votasaun inklui materiál sira.
“Materiál sira importante tebes, tanba ne’e tenki lori to’o fatin distinadu. Ha’u husu Brigada no Seguransa sira atu asegura didi’ak materiál sira,” nia hameno.
Notísia relevante: STAE Viqueque finaliza verifika no halo pakote materiál eleisaun
Iha biban hanesan, Administradór munisípiu Viqueque, Januário Soares ‘Boly’, tau fiar ba Brigada STAE no Ofisiál supervizaun CNE, tanba konsidera eleisaun atu la’o di’ak, iha entidade hirak ne’e nia liman.
“Eleisaun la’o di’ak ka ladi’ak Brigadista no Ofisiál Supervizaun sira mak hatene hodi fó imajen ba ema hotu katak eleisaun ne’e imparsiál, independente no neutru, ita boot sira sei hatudu iha fatin votasaun. Tanba ne’e, ha’u husu Brigadista sira hala’o knaar ho di’ak,” Autoridade munisipál ne’e apela.
Iha fatin hanesan, Komadante Polísia Nasionál Timor-Leste (PNTL) munisípiu Viqueque, Supertendente Polísia, Sebastião Alves Quintão, hateten, membru sira preparadu fó seguransa másimu iha sentru votasaun hotu iha munisípiu Viqueque.
“Ohin ha’u orienta ona membru atu fó seguransa hahú distribuisaun materiál eleisaun to’o fatin votasaun,” nia akresenta.
Nia garante, PNTL sei fó seguransa ba Eleisaun Prezidensiál iha loron 19 marsu, to’o lori fila urna sira hosi sentru votasaun mai administrasaun munisipál.
Molok hahú distribuisaun materiál eleisaun, entidade hanesan Diretór Servisu STAE no CNE Viqueque, Komadante PNTL munisipál no Administradór asina termu entrega.
Nune’e, STAE entrega urna ba Komadante PNTL Viqueque no hatutan ba Komadante Eskudra sira.
Materiál eleisaun tula iha karreta hamutuk 40-resin, ne’ebé durante serimónia distribuisaun partisipa hosi Diretór liña ministeriál, Administradór postu lima, Brigada, Ofisiál supervizaun CNE, Provedoria Direitu Umanu no Justisa (PDHJ, sigla portugés), Obserdór internasionál hosi Uniaun Europeia no hetan seguransa másima hosi PNTL.
Materiál eleisaun ne’ebé antes ne’e STAE Viqueque simu hamutuk kaixa 23, ne’ebé iha livru buletin votu hamutuk 1.321 no folla hamutuk 66.500.
Tuir dadus, númeru eleitór Eleisaun Prezidensiál 2022 iha munisípiu Viqueque hamutuk 58.421, kompostu hosi mane 29.675 reprezenta 51% no feto 28.746 reprezenta 49%.
Jornalista : Vitorino Lopes da Costa
Editora : Julia Chatarina
