Povu nia lian hosi RAEOA: “Prezidente foun tenke serbisu ho Governu investe iha agrikultura no saúde”

OÉ-CUSSE, 19 marsu 2022 (TATOLI) – Agrikultór-sira hosi suku Usitasa’e, sub-rejiaun Oésilo Rejiaun Administrativa Espesiál Oé-Cusse Ambeno (RAEOA), rekomenda ba xefe Estadu foun ba períodu 2022-2027 tenke serbisu hamutuk ho Governu nune’e investe ba setór agrikultura no saúde.

Votante Ricardo Sufa, hosi aldeia Sifin, suku Usitasa’e, hateten, nu’udar ezerse ona devér sívika kompri sidadania ne’ebé preve ona iha konstituisaun artigu 47 kona-ba diretu sufrájiu nian.

Tanba ne’e nu’udar sidadaun rekomenda ba kandidatu na’in-16 bainhira kandidatu ida eleitu liuhosi eleisaun ne’e, iha futuru ukun ho fuan no domin ba rai ne’e, atu serbisu hamutuk ho Governu atu tau matan ba povu nia produtu lokál.

“Prezidente tenke haree povu ho fuan no domin, tenke iha komitmentu koopera ho Governu kria atividade hodi rezolve nesesidade povu, primeiru tenke eduka hakiak animál, kuda produtu lokál ho plantasaun hanesan ai-kameli, tán ne’e husu mós atu promove diplimátika ho nasaun viziñu sira nune’e bele kria kooperasaun atu esporta povo nia produtu,” Ricardo Sufa expresa nia hanoin hafoin ezerse direitu votu iha sentru votasaun Tasaebeno, sábadu ne’e.

Tanba ne’e Ricardo Sufa, propoin ba xefe Estadu foun promove diálogu ho empreza internasionál no nasionál promove produtu agrikultura nian.

“Ami ne’e agrikultór ona, laiha dalan seluk ami serBisu mak to’os no natar, agora Governu mak tenkE dalan oinsá ami-nia produtu bele iha folin, bele kuda atu hán, maibé bele prepara lori ba mekcadu, maibé dalan laiha, dalaruma ita fa’an to’o dodok de’it tanba laiha ema atu hola, entaun prezidente foun mai presiza haree ida-ne’e hadomi o-nia povu ho fuan, tanba ami lakohi terus ona hanesan uluk, ita luta ba ukun an,” nia katak.

Votante Ângelo da Conceição, “ohin, povu Timor-Leste hili ita-nia prezixente, atu fó mahon ba povu, atu haree povu nia problema iha nasaun ne’e, tán ne’e ami hanesan agrikultura husu bainhira hetan vitoria karik, kria amizade di’ak fó liman ba malu atu lori ita-nia nasaun di’ak ba jerasaun tuir mai, labele istória hanesan tinan- rua liuba, ita haree imajen povu Timor-Leste monu”.

“Ita ukun-an tinan 20-resin ona, joven barak seidauk hetan serbisu. Saida mak ita haree, aman sira ladún unidade, hadau malu ukun, ikus mai povu mak terus, tanba bee-moos seidauk iha, estrada sei aat nafatin eskola balu seidauk di’ak, entaun ohin ita votu ona espera sé mak sai prezidente presiza halo reflesaun ba saida mak akontese iha pasadu tenke hadi’a ona, labele hein tán, tanba agora jerasaun foun mós matenek barak ona,” nia rekomenda.

Blandina Neno, hosi aldeia, Sifin suku Usitasa’e, espera ho prezensa prezidente foun servisu hamutuk ho Governu atu investe iha setór saúde.

“Tanba tinan kotuk ai-moruk laiha atu kura COVID-19, povu mak terus liu tanba sulan ami to’o tinan ida, la halo buat ida, fa’an de’it produtu ba merkadu mós ladi’ak, tán ne’e husu tenke dezenvolve área saúde importante ba ema hotu nia vida,” nia dehan.

Tuir Blandina, tinan barak ona povu sei sofre nafatin, tanba moras atu ba ospitál dalaruma ai-moruk kura laiha, entaun sé mak iha osan nia bele moris tanba ba konsulta iha rai-li’ur, maibé povu kbiit laek laiha osan nia mate nafatin.

Tuir dadus hosi STAE totál eleitór iha suku Usitasa’e sub-rejiaun Oésilo hamutuk hamutuk 2.749 kompostu hosi feto 1.367 no mane 1.382.

Iha sub-rejiaun Oésilo komposta hosi sentru votasaun tolu no estsaaun votasaun (1), hanesan sentru votasaun iha aldeia Sifin, sentru votasaun iha aldeia Pune hamutuk ho estasaun votasaun ida no sentru votasaun aldeia Buqui.

Nune’e mós totál eleitór iha teritóriu Oé-Cusse atu ezersie diretu votu iha eleisaun prezidensiál 19 marsu 2022 hamutuk 51.495 komposta hosi mane 26.232, feto 25.263, ho totál sentru votasaun 60 no estasaun votasaun 88, ne’ebé sei envolve brigadista na’in-60 no ofisiál eleitorál na’in-880.

Tuir observasaun hosi Agência Tatoli iha terrenu, sentru votasaun iha suku Usitasa’e loke hahú tuku 7:00 dadeersan, hetan apoia seguransa hosi PNTL, observa hosi Komisaun Nasionál Eleisaun (CNE, sigla portugés) no akompaña direita hosi fiskál kandidatura na’in-16.

Jornalista   : Abílio Elo Nini
Editór         : Evaristo Soares Martins