Kargu Xefia iha instituisaun Estadu na’in-365 deklara ona rikusoin

DILI, 24 marsu 2022 (TATOLI)— Adjuntu Komisáriu Komisaun Anti Korrupsaun (CAC, sigla portuges), ba Asuntu Prevensaun no Sensibilizasaun, Luis Oliveira Sampaio, informa daudaun CAC rejista kargu Xefia hamutuk 365 mak deklara ona rikusoin liuhosi prenxe formuláriu iha plataforma online.

Kargu xefia hirak ne’e mai hosi instituisaun Estadu hamutuk 19 mak deklara rikusoin no rendimentu bens no interese ho baze ba Lei númeru 7/2020, 26 agostu kona-ba Medida Prevensaun no Kombate Korrupsaun (MPKK).

“Hosi deklante sira ne’ebe potensiál atu deklara ne’e hamutuk 4.000-resin hosi intituisaun Estadu hamutuk 102 ne’ebé hamutuk hamutuk ho sira nian agregadu familia kuaze 18.000. Maibé iha semana sira ikus ne’e deklarante ne’ebe submete ona sira ninian deklarasaun hamutuk 365, hosi instituisaun Estadu 19,” Adjuntu Komisáriu CAC ne’e ba jornalista sira iha nia knaar fatin Matadoro, kinta ne’e.

Notísia relevante:  PR Lú-Olo deklara ona rikusoin ba Tribunál Rekursu

Kargu Xefia ne’ebé mak deklara ona riku soin mai hosi Ministériu Defeza, Ministériu Petróleu no  Minerál, Trade Invest,  Fundu Dezemvolvimentu Kapitál Humanu (FDCH),  Arquivo no Musseun Rezisténsia, Institutu Nasionál Seguransa Sosiál, Servisu Rejistu Verifiksaun Emprezarial (SERVE),  Autoridade Portuáriu Timor-Leste (APORTIL),  Servisu Autonómu Medikamentu no Ekipamentu Saude (SAMES),  Kaza Sivil Prezidensia Repúblika, Diretor Jerál no Diretór Nasionál sira inklui Diretór Jerál Prezidensiál  Konsellu Ministru no seluk tan.

“Iha lei medida Prevensaun no Kombate Korrupsaun (MPCC, sigla portugés) númeru 7/2020 hatuur regra no konsekuénsia medida sira ne’ebé Komisaun Nasionál Autoridade Kompetente sei foti tuir artigu 28. Liuliu aplika sansaun administrasaun ka koema bainhira deklarante sira ne’e la kumpre sira nian dever tuir prazu lei definidu,” nia akresenta.

Tanba hosi artigu 48 lei MPPC sita kuandu deklarante sira aprezenta tarde, ne’e iha nia konsikuénsia mak sei kua sira nian salariu baze mensál 25% too 30%

“Sé ami notifika tiha mak sira la aprezenta sira nian deklasaun rendimentu bens no interese tuir prazu ne’ebe maka define ne’e, bele hetan sansaun 30% hosi sira nian salariu base mensál,” nia afirma.

Nune’e, nia husu ba kargu Xefia iha insitituisaun Estadu atu deklara rikusoin sira no labele subar buat ruma liuliu hatete transparante no ho loloos tanba lei MPCC ne’e rigór tebes bele kondena ho tipu kazu krime oin-oin.

Tanba, Bazeia ba artigu 6 iha Lei 7/2007, 25 jullu kona-ba estatutu titulár soberania, katak lidensa órgaun soberanu sira tenke deklara nia riku-soin no família nian ba Tribunál Rekursu.

Enkuantu, tuir Lei númeru 7/2020, 26 agostu kona-ba Medida Prevensaun no Kombate Korrupsaun (MPCC, sigla portugés) iha kapitulu II Rejime Deklarasaun Rendimentu, Bens no Interese hosi artigu 27 to’o 58.

Nune’e, Lei MPKK define ona iha artigu 48 to’o artigu 53, katak ema ne’ebé simu ona pose tuir lei atu asume kargu xefia iha obrigasaun deklara riku-soin dentru 30 nia-laran, liu ida ne’e hetan sansaun ho koema 25% to’o 30%.

Notísia relevante:  2022, titulár órgaun soberanu no kargu xefia iha obrigasaun deklara rikusoin

Jornalista: Natalino Costa

Editór     : Florencio Miranda Ximenes