DILI, 24 marsu 2022 (TATOLI)–Ministru Finansa (MF), Rui Gomes, partisipa vídiu konferénsia ho reprezentante Banku Mundiál no Banku Dezenvolvimentu Aziátiku, ne’ebé reprezentante hosi parseiru ne’e aprezenta deskobrementu prelimináriu hosi avaliasaun sistema aprovizionamentu públiku Timor-Leste uza Methodology for Assessing Procurement System (MAPS).
Biban ne’e, Ministru konsidera aprovizionamentu públiku importante tebes atu ajuda Timor-Leste alkansa Objetivu Dezenvolvimentu Sustentável (ODS).
“Deskobrementu no rekomendasaun hosi MAPS bele serve hanesan baze ida hodi dezenvolve no implementa sistema aprovizionamentu públiku ne’ebé modernu, efisiente no sustentável ne’ebé aliña ho ODS,” Ministru hateten liuhosi nota ne’ebé Agência TATOLI asesu, kinta ne’e.
Tuir governante ne’e avaliasaun ne’e mai iha tempu ne’ebé oportunu tamba deskobrementu prinsipál sira bele ajuda informa ba Governu hodi reforsa liután Projetu Dekretu Lei Foun kona-ba Aprovizionamentu no Kontratu Públiku, ne’ebé Konsellu Ministru aprova ona no haruka ona ba Prezidente Repúblika atu tetu.
“Ida-ne’e hanesan pasu importante ida iha área Reforma Fiskál no Jestaun Finansa Públika ne’ebé sai nu’udar prioridade ida hosi Programa VIII Governu Konstitusionál,” nia akresenta.
Notísia relevante: Rejime jurídiku aprovizionamentu foun promove dezenvolvimentu ekonómiku no sosiál
Ba inisiativa ne’e, Ministru hato’o agradesimentu ba parseiru no enkoraja atu kontinua finaliza relatóriu no rekomendasaun sira ne’ebé tuir planu sei públika iha abríl 2022.
Enkuantu, iha tinan 2021 Gabinete Polítika Reforma no Kapasitasaun Jestaun Finansa Públika no Gabinete Apoiu Jurídiku Ministériu Finansa, serbisu hamutuk ho ekipa MAPS organiza ona konsultasaun no diskusaun via virtuál lubuk ida, ho reprezentante hosi liña ministériu relevante, ajénsia no institusaun Estadu, sosiedade sivíl, inklui setór privadu hodi halo avaliasaun kona-ba sistema aprovizionamentu públiku Timor-Leste uza metodolojia MAPS.
Objetivu dezenvolve MAPS atu apoiu Governu mellora dezempeñu sistema aprovizionamentu públiku hodi fó rezultadu di’ak ba uzu fundu públiku no informa dezempeñu atuál, dezafiu no oportunidade ba melloramentu dezenvolve planu asaun estratéjiku.
Jornalista : Antónia Gusmão
Editora : Julia Chatarina
