BOBONARO, 26 marsu 2022 (TATOLI) – Diresaun Transporte Terrestre (DTT) Munisípiu Bobonaro, iha fulan-janeiru to’o fevereiru tinan ne’e hatama reseita $15,787,50 ba kofre estadu.
Reseita hirak-ne’e rekolla hosi totál ema-ne’ebé trata dukumentu inspesaun transporte na’in-826 ho montante orsamentu $8,755,00, lisensa trajetu ema na’in-34 ho montante orsamentu $1,030, karta kondusaun na’in-264 ho montante $4,315 no rejistu mensál ema na’in-150 ho monante orsamentu $1,692,50.
“Totál ema ne’ebé mai ita halo atendimentu iha fulan-janeiru hamutuk invoice 665 ho ninia totál orsamentu $7,755,00 no iha fulan-janeiru nia mak totál invoice 622 ho montante osan $$8,032,50 no fulan rua nian ne’e ita rekolla hamutuk $15,787,50, ba fulan marsu nian seidauk,” Diretór DTT Munisípiu Bobonaro, José Paulo Henriques Baptista, informa ba Agência Tatoli, iha Maliana, sesta ne’e.
Enkuantu taxa anuál ne’ebé Diresaun Transporte Terrestre rekolla iha tinan 2021 hamutuk $70,351,50 hosi ema-ne’ebé trata dukumentu hamutuk 6,176, iha 2020 rekolla $87,294,00, maibé reseita hirak-ne’e kada tinan menus tanba implika hosi impase polítiku no pandemia Covid-1.
“Tanba ne’e mak agora ita planu atu tún fali ba terrenu halo cek point konjunta ho polísia tránzitu sira tuir baze legál ne’ebé mak iha atubele re-administra fila-fali serbisu atendimentu diresaun nian,” nia katak.
Daudaun ne’e funsionáriu DTT Bobonaro mós kontinua halo atendimentu ba motorista hanesaan bainbain no sira-ne’ebé hakarak trata karta kondusaun ba motorizada bele prienxe kritéria ne’ebé iha ona hodi tuir teste eskrita, orál no prátika iha terrenu hafoin pasa mak sei entrega kartaun provizóriu.
Notisia Relevante: DTT Bobonaro rekolla rihun $19-resin hosi ezame karta kondusaun
Jornalista : Sérgio da Cruz
Editór : Evaristo Soares Martins
