ELEISAUN, ERMERA, HEADLINE, MUNISÍPIU, POLÍTIKA

Kampaña abertura: Lú Olo koordena ho ezekutivu fó prioridade ba povu nia moris di’ak

Kampaña abertura: Lú Olo koordena ho ezekutivu fó prioridade ba povu nia moris di’ak

Kandidatu Prezidente Republika períodu 2022-2027, Francisco Guterres Lú Olo, akompañadu hosi Prezidente PLP Taur Matan Ruak, Konsilleiru másimu KHUNTO José Naimori Bukar no Sekretáriu Jerál FRETILIN, Mari Alkatiri, iha kampaña abertura ne’ebé hala’o iha Gleno-Ermera, sábadu (02 abríl 2022). Imajen TATOLI/Anito Santos.

ERMERA, 02 abríl 2022 (TATOLI)—Kandidatu Prezidente Repúblika ba períodu 2022-2027, ho númeru sorteiu 2, Francisco Guterres Lú Olo, sábadu ne’e hala’o kampãna abertura dahuluk ba eleisaun prezidensiál segunda volta ho tipu komísiu iha kampu futebol Gleno, munisípiu Ermera.

Lú Olo hateten, iha nia kompromisu polítiku katak bainhira eleitu sai Prezidente Repúblika sei kumpre de’it knar tuir konstituisaun no iha konstituisaun fó dalan Prezidente Repúblika atu halo koordenasaun instituisional ho órgaun soberania seluk hanesan Governu, Parlamentu Nasionál no Tribunál hodi implementa programa ba povu nia moris di’ak.

“Interdependensia no koordenasaun nune’e Prezidente Repúblika iha influénsia majistratura hamutuk ho Governu hodi hatene programa área edukasaun, saúde, agrikultura no seluk tan bele implementa ba povu nia moris di’ak,” nia hateten perante ba militante atu ba rihun.

Tanba ne’e, nia dehan, bainhira proposta Orsamentu Jerál Estadu kada tinan hetan ona aprovasaun hosi Parlamentu Nasionál haruka ba Xefe Estadu sei estuda hodi haree alokasaun ba iha programa sira mak sei promulga.

Bainhira hala’o vizita no halo diálogu aberta no rona komunidade nia preokupasaun kona-ba  estrada, bee-moos.infraestrutura no seluk tan sei ko’alia ho Governu hodi tau atensaun.

Apoiante Kandidatu PR Lu Olo iha Gleno-Ermera. Imajen Tatoli/Anito Santos.

Nia hateten, lei inan ko’alia kona-ba órgaun podér Estadu nian fundamentál define iha relasaun ho órgaun soberania seluk entre Xefe Estadu ho ezekutivu, tanba Xefe Estadu nomeia Primeiru Ministru (PM), maibé PM mai hosi partidu indijitadu hosi eleisaun parlamentár tanba ne’e nia parte sei ko’alia ho ezekutivu hodi implementa programa sira ba povu nia moris di’ak.

“Prezidente Repúblika iha kompeténsia ida mós ho Governu hanesan iha enkontru semenál ho Primeiru-Ministru hodi fó nafatin ba Xefe Estadu kona-ba polítika ne’ebé Governu implementa hodi hadi’a povu nia moris liuhosi área edukasaun, saúde, agrikultura no seluk tan. Nune’e Prezidente Repúblika nia relasionamentu ho ezekutivu mak ida ne’e nune’e bele trata hamutuk,” nia hateten.

Relasaun instituisionál haree dekretu-lei ruma ne’ebé Governu submete bainhira simu sei avalia no estuda serve duni ba interese povu nian mak sei promulga.

Nia hatutan, hanesan forma organizaun podér polítiku no ezersisiu podér polítiku nian sei limita de’it ba própria kompeténsia nune’e sei garante funsionamentu instituisaun demokrátika.

“Aspeitu organizasaun podér polítiku no exersisiu podér polítiku rua ne’e lao hamutuk iha forma organizasaun Estadu nian,” nia hateten.

Nune’e, Prezidente Repúblika iha kompeténsia bainhira hanesan órgaun soberania uza kompeténsia ne’ebé tenke moris hamutuk halo interdepedénsia ba malu ho órgaun seluk hanesan Governu.

Relasaun institusional ho Parlamentu Nasionál lei sira-ne’ebé submete sei ba to’o iha Prezidente Repúblika sei estuda ho didi’ak hafoin promulga.

Atuál Prezidente Repúblika ne’e hateten prosesu eleisaun primeiru seidauk hotu no agora hakat ba segundu volta ho ida-ne’e husu ba apoiante no povu  vota nia kandidatu tanba liuhosi lejitimidade povu nian mak hili hodi realiza kompromisu sira.

Lú Olo sente orgullu iha segundu volta hetan mós apoiu hamutuk ho Prezidente PLP,
Sekretáriu Jerál Fretilin, Mari Alkatiri, Konselleiru partidu Khunto, José Naimori Bukar no partidu sira seluk.

Sekretáriu Jerál Partidu Fretilin, Mari Alkatiri, hateten ho programa sira-ne’ebé kandidatu hato’o ida-ne’e mak ba povu nia moris di’ak nune’e husu apoiante no povu tomak atu vota ba Lú Olo iha eleisaun segundu volta iha 19 abríl ne’ebé mai.

Prezidente Partidu Libertasaun Populár, Taur Matan Ruak, hateten Governu ida-ne’ebé partidu tolu sustenta hanesan Fretilin, PLP, KHUNTO no nia parte hanesan Primeiru-Ministru iha programa no planu balun halo ona no barak seidauk, tanba ne’e dahuluk atu halo mak tenke garante tinan lima oin mai estabilidade polítika no governativa tenke metin hodi servi povu.

“Tanba ne’e ita la’ós ukun de’it agora maibé 2023 ba oin tanba partidu tolu ne’e sei la soe malu no seluk sei mai tan reforsa garante estabilidade polítika no governativa ne’e kondisaun mesak atu bele hetan kbiit hala’o programa sira. Nune’e presiza imi-nia apoiu kandidatu ida ajuda ho ha’u ida mai la’ós atu mai sobu ho ida-ne’e husu atu vota ba kandidatu númeru 2, Lú Olo,” Taur hateten.

Enkuantu, iha kampaña ne’e partisipa hosi Sekretáriu Jerál partidu Fretilin, Mari Alkatiri, Prezidente PLP, Taur Matan Ruak, Konselleiru Másimu Partidu KHUNTO, José Naimori Bukar,
no hetan partisipasaun másimu hosi militante partidu Fretilin, Partidu Libertasaun Populár (PLP), partidu Kmanek Haburas Unidade Nasionál Timoroan (KHUNTO), partidu Os Verdes no seluk tan.

Kampaña ne’e mós hetan superviziona hosi Komisaun Nasionál Eleisaun (CNE, siglá portugés), observadór internasionál no mós hetan seguransa másimu hosi Komandu Polísia Nasionál Timor-Leste (PNTL), munisípiu Ermera ne’ebé hahú iha tuku 15h25 no ramata iha tuku 18h00 hodi kumpre kalendáriu kapaña hosi órgaun eleitorál.

Tuir oráriu kandidatu PR, Lú Olo iha loron 03 abríl, sei kontinua hala’o nia kampaña ba loron daruak iha munisípiu Covalima.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!