OÉ-CUSSE, 04 abríl 2022 (TATOLI) – Iha tinan ne’e populasaun Rejiaun Administrativa Espesiál Oé-Cusse Ambeno (RAEOA), hosi suku 18 no aldeia 63 sei asesu ona iluminasaun eletrisidade 100%, tanba progresu instalasaun liña eletrisidade ba sub-rejiaun haat iha 2021 daudaun ne’e atinje ona 90%.
Xefe Departamentu Eletrisidade Timor-Leste (EDTL) Oé-Cusse, Armindo Mendonça, hatete, populasaun Oé-Cusse hosi suku 18 no aldeia 63 asesu ona ba eletrisidade durante oras 24 nia laran, nu’udar rezultadu progresu hosi implementasaun polítika Zona Espesiál Ekonómia Sosiál Mercadu Timor-Leste (ZEESM TL) hosi 2015 to’o 2021.
“Iha tinan hirak kotuk, populasaun asesu ona 95%, atu kompleta ba 100% tinan kotuk autoridade loke konkursu, iha empreza haat mak liu, agora sira instala hela dezde novembru tinan kotuk to’o agora, iha abríl ne’e hotu-hotu sei remata ona, prioridade liu fatin izoladu sira, ne’ebé dook hosi rede distribuisaun sei asesu hotu,” Armindo Mendonça, informa ba Agência Tatoli iha Padimau, Oé-Cusse, segunda ne’e.
Tuir nia, instalasaun iha sub-rejiaun Pante Makasar, Oésilo, Pássabe no Nítibe, daudaun ne’e atinje ona 86 to’o 90%, ne’ebé iha fulan-abríl tinan ne’e empreza sira remata ona ba 100%, tanba materiál hotu-hotu preparadu ona.
“Porsentu ne’e hela serbisu kmaan de’it, servisu fíziku finaliza, hela de’it atu rakit transformadór no trafo, depois koko ahi tama ba uma komunidade loos ona, entaun Oé-Cusse 100% ema hotu-hotu asesu ona ahi iha oras 24, tantu fatin públiku no izoladu sira,” nia afirma.
Entretantu, totál empreza haat (4) halo instalasaun liña eletrisidade iha sub-rejiaun Pante Makasar, Oésilo, Nitibe no Pássabe mak hanesan:
Iha sub-rejiaun Pante Makasar, ezekuta hosi empreza Grand Enclave Unipesoál halo instalasaun iha fatin izoladu Bubuneu, Kinloke, suku Naimeco, no iha Lakufoan suku Costa ho valór kontratu $329,849.39.
Iha sub-rejiaun Oésilo ezekuta hosi empreza Am-Lhichoe Unipesoál Lda, halo instalasaun iha fatin izoladu Tuapenu suku Bobometo, Nakome, suku Usitasa’e, Katu’i no Nitas, suku Usitaqueno ho valór kontratu $328,450.07.
Iha sub-rejiaun Pante Makasar ezekuta hosi empreza Uma-Oli Unipesoál Lda, halo instalasaun iha fatin izoladu Paineno, Oétulu, Sikone suku Bobokase, Maonmuti, Kiupanaf, suku Cunha ho valór kontratu hamutuk $306,493.70
Iha sub-rejiaun Nítibe ezekuta hosi empreza Elo Manu Benu Unipesoál Lda, halo instasalaun iha fatin izoladu Binaos, Kabuka Tubu, Fatusobe no Nunumtasa suku Usitaco, Lelain no Taep, Bebo, Cabana, suku Suni-Ufe, inklui Hauboni suku Taiboko sub-rejiaun Pante Makasar.
Nune’e mós kontinua halo instalasaun iha sub-rejiaun Pasabe sei halo instalasaun iha fatin izoladu Bisine, Nunsena, Nun-Atais no Ato, suku Abani ho valór kontratu $260,617.91
Entretantu, iha outubru 2021 Autoridade Rejiaun Administrativa Espessiál Oé-Cusse Ambeno (RAEOA) prevee millaun $1-resin ($1.225,411.07) hosi Orsamentu Jerál Estadu (OJE) 2021, aloka ba Diresaun Rejionál Infraestrutura (DRI) liuhosi Departementu Eletrisidade Timor-Leste (EDTL) hodi instala liña eletrisidade iha sub-rejiaun haat, Pante Makasar, Oésilo, Pássabe no Nítibe ba fatin sira-ne’ebé dook hodi rede distribuisaun enérjia eletrisidade.
Notisia relevante: http://www.tatoli.tl/2021/10/27/raeoa-aloka-millaun-1-resin-instala-lina-eletrisidade-iha-sub-rejiaun-haat/
Jornalista : Abílio Elo Nini
Editór : Evaristo Soares Martins
