BAUCAU, 04 marsu 2021 (TATOLI) – Motorista transporte públiku kompostu hosi bís diresaun Baucau-Dili no mikrolete diresaun munisípiu Baucau hala’o asaun protesta greve rendimentu tanba folin mina sa’e maka’as.
Motorista sira halo protesta ne’e ho modelu greve rendimentu, tanba iha situasaun normál hetan rendimentu kada loron dolar $70, maibé folin mina sa’e rendimentu tún ba dolar $30 de’it.
Abrão da Costa nu’udar portavós motorista, hateten, daudaun ne’e rendimentu transporte publiku tún tanba impaktu hosi folin mina sa’e nune’e husu atu governu rejista preokupasaun ne’ebé hato’o hanesan hatun folin mina ka hasa’e tarifáriu ba pasajeiru.
“Ami husu ba governu hatún mina nia folin, sé lae hasa’e pasajeiru nia tarifáriu,” Portavós motorista públiku hateten iha Vila Nova, segunda ne’e.
Abrão esplika, antes folin mina seidauk sa’e motorista bís loron ida hetan rendimentu dolar $70 hosi tarifáriu kada pasajeiru $4 maibé folin mina sa’e rendimentu tún loron ida $ 30 tanba osan ne’ebé hetan tenke ense mina ba bís.
Motorista sira ezije tarifáriu ba kada pasajeiru diresaun Baucau-Dili hasa’e ba $5 tanba folin mina litru ida $1.30 sentavu.
“Ami sei la halo sirkulasaun bainhira ezijénsia sira-ne’e governu la konsidera,” Abrão akresenta.
Hatán ba preokupasaun ne’e, Diretór Servisu Munisipál Transporte Terrestre Baucau, Roberto da Cruz, rejista prekupasaun hirak ne’e hodi kria inkontru koordenasaun ho Prezidente Autorididade Munisipál nune’e sei hato’o ba Ministériu Transporte no Komunikasaun (MTK) hodi buka solusaun.
“Aspirasaun sira ami sei hato’o ba nasionál hodi fó solusaun mai tanba ami labele foti desizaun,” Roberto hateten.
Hosi observasaun Agência TATOLI nota, maioria transporte públiku hanesan bís no mikrolete, segunda ne’e laiha sirkulasaun no halo asaun protesta iha DTT Baucau relasiona ho folin mina sa’e ne’ebé fó impaktu ba rendimentu kada loron.
Jornalista : Natalino Belo
Editór : Evaristo Soares Martins
