ELEISAUN, HEADLINE, MUNISÍPIU, OÉ-CUSSE (RAEOA), POLÍTIKA

CNE apela estrutura munisipál labele realiza mini kampaña iha tempu kalan

CNE apela estrutura munisipál labele realiza mini kampaña iha tempu kalan

Diretór Komisaun Nasionál Eleisaun (CNE, siglá portugés) Rejiaun Administrativu Espesiál Oé-Cusse Ambeno (Raeoa), Tomás Okui. Imajen Tatoli/Nelson de Sousa.

OÉ-CUSSE, 05 abríl 2022 (TATOLI) – Diretór Komisaun Nasionál Eleisaun (CNE, sigla portugés) iha Rejiaun Administrativa Espesiál Oé-Cusse Ambeno (RAEOA), Tomás Oqui Meta, husu estrutura munisipál kandidatu Prezidente Repúblika atu labele realiza mini kampaña ho tempu kalan, hosi evita interupsaun problema iha baze.

Tomas Oqui Meta, hatete, regra kompaña nia prosedimentu bazea regulamentu eleitorál ida de’it, kampaña nasionál ka mini kampaña, hahú oras 08:00 dadeer to’o lokraik tuku 18:30, la autoriza kandidatu sira, realiza iha fatin públiku hanesan, edifisiu públiku, eskola no igreja, liuliu realiza ho tempu kalan.

Tuir nia, dezde hahú hosi eleisaun volta dahuluk to’o volta daruak parte CNE seidauk identifika kampaña kalan nian, ne’ebé ba oin sei tau matan nafatin ba atividade ne’e, hodi evita interupsaun problema iha suku.

“Ita informa ona ba estrutura no husu labele halo mini kampaña iha tempu kalan, tanba ne’e kontra lei kampaña nian, ami mós serbisu hamutuk autoridade komunitáriu, ofisiál CNE mós destaka ona iha suku 18, no OPS sira karik kandidatu balu halo kampaña iha kalan, ami sei halo intervensaun, nune’e labele mosu interupsaun no problema iha suku. Ita espera no husu kandidatu sira atu kumpri tuir regulamentu eleitorál nian,” Tomas Oqui, informa ba Agência Tatoli iha Sikluli, Oé-Cusse, tersa ne’e.

Responsável ne’e fundamenta, daudaun ne’e kandidatu númeru sorteiu 1, José Ramos Horta, realiza ona kampaña nasionál iha Oé-Cusse, kandidatu númeru sorteiu 2, Francisco Guterres ‘Lu Olo’ sei hala’o iha loron 09 semana ne’e.

“Maibé sira-nia estrutura ekipa susesu iha Oé-Cusse, hatama ona pedidu autorizasaun mini kampaña kompleta kedas ho oráriu no fatin inklui tempu atu hala’o iha nível suku no aldeia, entaun CNE mós komunika ona ho autoridade lokál, atu koopera malu ho kandidatura sira nune’e mini kampaña ne’e bele la’o susesu,” nia afirma.

Nune’e mós iha segunda 03 abríl ne’e, parte CNE destaka ona ofisiál supervizaun iha idak-idak nia suku, tanba antes ne’e rekruta ofisiál hirak-ne’e mai hosi suku 18 iha teritoriu Oé-Cusse, atu apoia halo monitorizasaun to’o kalendáriu kampaña termina.

Entretantu, totál ofisiál CNE iha Oé-Cusse hamutuk na’in-88, hodi halo supervizaun iha sentru votasaun 60 no estasaun votu hamutuk 88 iha territóriu Oé-Cusse.

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!