LIQUIÇÁ, 06 abril 2022 (TATOLI)–Kandidatu Prezidente Repúblika (PR) hosi Partidu Congresso Nacional de Reconstução de Timor (CNRT) períodu 2022-2027, ho númeru sorteiu 01, José Ramos Horta, kuarta ne’e, hala’o diálogu ho komunidade iha suku Tibar, postu administrativu Bazartete, munisípiu Liquiçá.
Iha ámbitu ne’e, komunidade Tibar husu ba kandidatu Horta, bainhira eleitu sai PR, komunika ho parte kompetente hodi tau-matan ba lixeira tibar ne’ebé fó impaktu maka’as ba saúde.
“Meiu dia ami sei simu ar fresku, maibé lorokraik lixeira tibar ne’e iis no nakukun hanoin udan, maibé ahi-suar mak taka tomak tiha, kuandu ema ruma moras asma maka labele la’o ona tanba sei afeta maka’as tebes. Preokupasaun ami-nia ne’e hato’o beibeik ona, maibé realidade mak hanesan ne’e. Tanba ne’e maka bainhira ita (Horta) sai Prezidente Repúblika, presiza tau-atensaun hela,” Reprezenta komunidade Tibar, Fátima Aurea, hateten iha ámbitu diálogu iha Tibar.
Notísia relevante: Asosiasaun Estudante Liquiçá husu rezolve lixeira Tibar labele fó impaktu saúde
Hatán ba preokupasaun ne’e, Horta admite papel PR nian la to’o atu haree ba asuntu sira ne’e, maibé promete sei komunika ho Governu no parseiru internasionál sira hodi nune’e iha tinan 2023 tenki rezolve lixu.
“Ha’u hatene Governu kontaktu ona kompañia balun atu haree lixeira ne’e tanba buat balun iha lixeira ne’e bele aproveita, tanba kompañia ne’ebé halo resiklajen, sira hateten la’ós fasil tanba tinan lubuk ida nia laran maibé ne’e prioridade tanba kestaun sosiál no saúde populasaun nian, ha’u sei ko’alia maka’as no urjensia ho Governu hodi rezolve,” nia promote.
Horta sei husu mós ajuda ba parseiru internasionál sira hodi responde urjente ba preokupasaun populasaun sira.
Durante diálogu hetan supervizaun hosi Komisaun Nasionál Eleisaun (CNE, sigla portugés), observadór internasionál no hetan seguransa hosi Polísia Nasionál Timor-Leste (PNTL).
Jornalista : Antónia Gusmão
Editora : Julia Chatarina
