Unidade turizmu ho autoridade komunitária diskute dezenvolve Lifau sai fatin turístika

OÉ-CUSSE, 06 abríl 2022 (TATOLI) – Unidade Turizmu Komunitáriu ne’ebé tutela iha Gabinete Prezidente Autoridade Oé-Cusse, kuarta ne’e konvida autoridade komunitária suku Costa, sub-rejiaun Pante Makasar, hahú diskute ba futuru instalasaun ambiente Lifau atu sai fatin turístika iha Rejiaun Administrativa Espesiál Oé-Cusse Ambeno (RAEOA).

“Ohin, ami halo diskusaun ho autoridade suku Costa, kona-ba tasi-ibun Lifau, tanba autoridade hakarak dezenvolve fatin ne’e sai fatin turístika, tanba fatin ne’e fatin istória, entaun ami konvida-sira mai, apoia ideia, atu hadi’a di’ak liután fatin ne’e, ba turizmu,” Koordenadora Interina Unidade Turizmu Komunitária, Maria Julieta da Costa, informa ba Agência Tatoli iha salaun edukasaun, Oé-Cusse.

Nia informa, planu ne’ebé ajenda ona atu dezenvolve fatin istória ne’e, sei kria grupu inovativu kreatividade sira envolve hotu, tanba parte autoridade sei instala fasilidade hanesan bee-moos, ahi no kompleta ho fasilidade sanitária, entaun bainaka ruma mai hala’o vizita iha Oé-Cusse, persiza produtu ruma, ita prepara ona ho kondisaun konsentradu.

Tuir nia, atu realiza planu ne’e, daudaun ne’e parte unidade turizmu serbisu hamutuk ho tékniku arsitetu na’in-rua hahú prepara ona dezeñu ba fatin, no identifka ona produtu ne’ebé sei promove iha fatin hirak-ne’e maka henesan, hahán tradisionál Oé-Cusse nian, katupa, nú-ben, no tais selenda, inklui produtu tradisionál seluk no prepara fatin ba peskadór sira.

“Bainhira ami remata diskusaun ho autoridade komunitáriu sira, ami sei aprezenta planu no ideia hotu ba Prezidente Autoridade, hodi haree no tetu, karik hetan aprovasaun, entaun ita iha planu kaléndariu atu konstrui fatin sira-ne’e,” nia katak.

Xefe aldeia Sanane, suku Costa, Fransisco Ais, nu’udar autoridade komunidade apresia ho planu ne’e, tanba Lifau hanesan fatin dahuluk misionáriu Katólika tama iha Timor-Leste.

“Diskusaun ne’e pertinente tebes atu dezenvolve fatin istória Lifau, ita apoia planu ne’e maibé tenke realiza katak, tenke halo uma no tau fasilidade nune’e ita bele dehan fatin turístika, ne’ebé ami espera atu realiza, tanba durante ne’e joven katuas barak mak halo atividade peskadór iha ne’ebá, entaun sei ajuda sira atu fa’an de’it iha fatin ne’e,” autoridade lokál ne’e orgullu.

Jornalista       : Abílio Elo Nini
Editór             : Evaristo Soares Martins