DILI, 07 abril 2022 (TATOLI)—Prezidente Asosiasaun TANE Konsumidór, António Ramos da Silva ‘Naikoli’, husu Governu liuhosi Ministrériu Petróleu no Minerál (MPM) tenke regula no kontrola folin kombustível ne’ebé daudaun sa’e iha merkadu nasionál, tanba se lae folin iha merkadu globál la sa’e signifikante maibé iha nasionál mak sa’e maka’as.
“Governu labele husik fali folin mina mak deside fali folin kombustível merkadu nian, tanba bainhira fornesedór determina folin ne’e bele prejudika direitu konsumidór sira,” Prezidente Asosiasaun hateten iha ninia knaar fatin, Villa-verde, kinta ne’e.
Notísia relevante: Folin kombustível sa’e tanba impaktu merkadu mundiál

Relasiona ho asuntu ne’e, asosiasaun halo peskiza ba folin kombustível iha merkadu nasionál iha estasaun kombustível hamutuk 19, ne’ebé hosi loron 28 fevereiru 2022 hatudu katak folin gazolina no gazoel $1,10 to’o $1,26 no iha loron 05 to’o 07 abril, folin hahú sa’e $1,30 to’o $1,40.
Nune’e, António Ramos rekomenda ba Governu hodi regula folin kombustível tenke adapta ho folin merkadu globál.
“Kondisaun ne’e la favorável atu fó dalan ba fornesedór kombustível atu aproveita kualker lukru, maibé folin kombustível ne’e depende ba presu internasionál,” nia hateten.
TANE mós rekomenda ba autoridade kompetente hanesan MPM, Autoridade Nasionál Petróleu no Minerál (ANPM) no seluk tan atu halo diálogu ho fornesedór no konsumedór kombustível hodi hetan informasaun detallu kona-ba mudansa presu nasionál no globál.
Antes ne’e, Diretór Downstream ANPM, Nelson de Jesus, hateten, folin kombustível iha Timor-Leste sa’e tanba impaktu hosi folin merkadu mundiál.
“ANPM hanesan reguladora ba mina haree folin kombustível daudaun sa’e tanba impaktu hosi merkadu mundiál hanesan hosi supply chain ne’ebé hasa’e folin mina tanba mina mai hosi mina matak ne’e folin sa’e,” nia dehan.
Jornalista : Arminda Fonseca
Editora : Julia Chatarina