Taur-Naimori husu povu vota Lú Olo hodi garante pás no estabilidade

AINARO, 11 abríl 2022 (TATOLI)— Kandidatu Prezidente Repúblika períodu 2022 too 2027, ho númeru sorteiu 2, Francisco Guterres Lú Olo, segunda ne’e, hala’o kampaña ba eleisaun Presidensiál segunda volta ho tipu komísiu iha kampu futeból Ainaro.

Maske, kampaña aberta ne’e Kandidatu LÚ-Olo la partisipa tanba kondisaun saúde, maibé reprezenta hosi Sekretáriu Jerál Partidu FRETILIN, Mari Alkatiri, Prezidente Partidu Libertasaun Popular (PLP), Taur Matan Ruak no Konselleru Másimu Partidu Kmanek Haburas Unidade Nasionál Timoroan (KHUNTO), José dos Santos Naimori Bucar.

Notísia relevante:Eleitu ba PR, Lú-Olo promete kontinua serbisu ho Governu-PN hodi dezenvolve TL

Iha ámbitu kampaña, Prezidente Partidu Libertasaun Popular (PLP), Taur Matan Ruak husu ba povu hotu lalika tauk vota ba kandidatu númeru sorteiu 2, Francisco Guterres Lú Olo atubele garante pás no estabilidade hodi hametin nasaun no apoiu programa Governu nian hodi hala’o dezenvolvimentu.

“Nasaun nia-aman mak Prezidente Repúblika no inan mak Primeiru Ministru, ne’ebé eleisaun agora imi tenke fihir aman ne’ebé di’ak mak númeru 2. Ida ne’e mak ha’u fó votu no husu inan-aman hotu joven sira hotu imi nia tulun fó votu ba ha’u nia kandidatura,” Prezidente PLP Taur hateten liuhosi intervensaun iha kampaña ne’e.

Taur dehan fó votu konfiasa ba Lú Olo atu apoia programa di’ak sira hanesan, kada dezembru família sira sei simu $200 no kontinua harii Uma Kbiit La’ek ba povu hotu no seluk tan bele realiza.

“Ha’u husu ba imi hotu fó apoia ba ha’u nia kandidatura, atu nune’e bele tulun ha’u hodi realiza programa Governu nian ne’ebé atu implementa tinan ne’e no tinan oin,” nia afirma.

Iha biban hanesan, Konselleru Másimu Partidu Kmanek Haburas Unidade Nasionál Timoroan (KHUNTO), José dos Santos Naimori Bucar, husu ba Ainaro-oan hotu atu vota ba kandidatuu númeru 2, Francisco Guterres Lú Olo iha eleisaun segunda volta ne’ebé realiza iha 19 marsu ne’e.

“Ainaro-oan hotu mai ita hotu fó votu ba maun Lú Olo atu sai Prezidente Repúblika ida ne’ebé kalma, iha nia mandate halo buat lubuk, konsege promulga lei no Dekretu-Lei lubuk ida liu-liu programa Governu nian hodi halo dezenvolvimentu, nune’e ita tenke vota nafatin ba nia,” Naimori hateten liuhosi intervesaun iha kampaña ne’e.

Tuir Naimori, so Lú Olo manán sai Xefe Estadu mak bele defende VIII Governu konstitusionál ne’ebé lidera hosi Jenerál Taur Matan Ruak atubele metin liután halo dezenvolvimentu iha país ne’e.

“Maun Lú Olo manán nia sei defende Governu ida ne’e, Governu ida ne’e sei bele halo buat barak liu tan, buat hotu programadu ona iha tinan ne’e no tinan oin hakarak programa sira ne’e hotu realiza ho di’ak mak vota ba maun Lú Olo,” Naimori afirma.

Naimori mós husu ba membru KHUNTO iha munisípiu hotu atu lalika tauk atu votu konfiasa ba Kandidatu PR Lú Olo.

Sekretáriu Jerál Partidu FRETILIN, Marí Alkatiri, dehan haree ba merkadu rai laran folin sasan sa’e, nia rasik hatoo ona proposta ba Governu atu haree ba saláriu minimu traballadór nian.

“Ha’u haruka ona proposta ida ba Governu hodi haree ba solusaun traballadór sira nian, traballadór sira ne’ebé servisu ba empreza atu haree sira nia saláriu. Tanba saláriu minimu ita nian kompara ho Indonézia boot ona, maibé kompara ho ita nia vida karun ne’e oituan, ne’ebé Governu bele konsidera hasa’e netik pursentu uitoan,” nia dehan.

Notísia relevante: Lú Olo promete bainhira reeleitu sai PR sei hadi’a povu-nia moris

Jornalista: Hortencio Sanchez

Editór       : Florencio Miranda Ximenes