BOBONARO, ELEISAUN, HEADLINE, INKLUZAUN SOSIÁL, MUNISÍPIU, POLÍTIKA

Atabae-oan sira husu PR eleitu influénsia Governu dignifika família vulnerável

Atabae-oan sira husu PR eleitu influénsia Governu dignifika família vulnerável

Xefe aldeia Madebau, suku Atabae, postu administrativu Atabae, munisípiu Bobonaro, Arjelia Fontes. Imagen Tatoli/Sérgio da Cruz.

BOBONARO,13 abríl 2022 (TATOLI) –  Kandidatu Prezidente Repúblika Francisco Guterres ‘Lú Olo’ no José Manuel Ramos Horta mak sei kompete iha eleisaun prezidensiál volta daruak iha loron 19 abríl, nune’e Atabae-oan sira husu kandidatu ida-ne’ebé povu maioria eskolla tenke inflénsia Governu dignifika família vulnerável iha área rurál.

Xefe suku Atabae, postu administrativu Atabae, munisípiu Bobonaro, Paulino Bere Pelu, reprezenta Atabae oan husu Prezidente Repúblika ne’ebé eleitu ba mandatu tinan lima atu  influénsia Governu kria polítika ida hodi dignifika  família vunerável iha área remota.

“Ita-nia kandidatu na’in-rua ne’ebé atu kompete iha eleisaun prezidensiál volta daruak, karik povu fó fiar sai xefe estadu importante liu mak tau matan ba ita-nia komunidade kbiit laek no família vulnerável sira no oan kiak sira-ne’ebé seidauk hetan oportunidade atu asesu ba edukasaun no saúde,” nia informa ba Agência Tatoli, iha Atabae, tersa ne’e.

Xefe suku Atabae, postu administrativu Atabae, munisípiu Bobonaro, Paulino Mali-Bere. Imajen Tatoli/Sérgio da Cruz.

Líder komunitária koalia asuntu ne’e tanba governansaun eziste ona to’o VIII Governu Konstitusionál maibé família vulnerável barak iha área remota sei moris ho kondisaun terus.

Nune’e mós komunidade Pedro Tavares, propoin ba xefe estadu eleitu atu uza nia kompeténsia halo kooperasaun di’ak ho nasaun dezenvolvidu sira atubele atrai investidór sira mai iveste iha Timor-Leste hodi kria kampu traballu ba Timor-oan hotu.

“Ita-nia númeru dezempregu tinan ba tinan kontinua aumenta, depois eskola hotu tiha mai fali foho tanba Governu la uza, entaun sira tenke halai fali ba Korea no Inglaterra hodi buka moris atu hadi’a ekonomia família no sustenta oan sira-nia eskola,” komunidade ne’e hateten.

Pedro Tavares rekomenda ba kandidatu Prezidente Repúblika na’in-rua ne’ebé preparadu kompete iha eleisaun volta daruak no tenke simu rezultadu votasaun ho fuan no laran, maske nu’udar adversáriu iha palku polítiku ne’e lakon ka manán normál, maibe importante mak liu fó ideia ba malu hodi hadi’a povu nia moris ho prosperiedade.

Xefe aldeia Madebau, suku Atabae, Arjelia  Fontes Reismos husu ba PR eleitu atu kompre premesa polítika durante períodu kampaña eleitorál tanba promesa ne’e tenke justifika ho prátika.

“Ami presiza liu mak estrada tanba kondisaun estrada liga hosi ami-nia suku ba to’o ponte Loes iha tempu udan defisil tebes ba agrikultór sira lori produtu lokál ba faa’n iha merkadu Maliana no Atabae Vila. Sé nai prezidente foun tau interese mai ami povu sira iha kraik, favór boot ida ko’alia ho Governu atubele hadi’a ami-nia moris,” nia fó hanoin.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!