Governu apoia ona nesesidade bázika ba vítima inséndiu iha suku Afaçá
BAUCAU, 13 abríl 2022 (TATOLI) – Servisu Munisipál Protesaun Sivíl no Jestaun Dezastre, apoia ona nesesidade bázika vítima inséndiu iha suku Afaçá, postu administrativu Quelicai, munisípiu Baucau.
Inséndiu ne’e akontese iha área Abagia, aldeia Uligata, suku Afaçá, postu administrativu Quelicai, munisípiu Baucau deskonfia sirkuitu eletrisidade ne’ebé rezulta uma ida inklui dapur-ida hetan estragu.
Inséndiu ne’e akontese iha loron-tersa, 12 fulan-abríl purvolta tuku 14:00 resin meodia, bainhira vítima Tomás Ximenes hamutuk ho membru família laiha uma tanba partisipa prosesu fúnebre.
“Informasaun ne’ebé ami hetan, konfirma katak akontesimentu ne’e derrepente de’it vítima mós la hatene, ahi haan hosi uma-laran entaun la konsege salva sasán sira iha uma-laran, ita deskonfia sirkuitu eletrisidade,” Diretór Servisu Munisipál Protesaun Sivíl no Jestaun Dezastre, Nelson Nunes, ko’alia iha Vila Nova, kuarta ne’e.
Protesaun sivíl no komisaun dezastre munisípiu Baucau liuhosi diresaun protesaun sivíl nian distribui ona apoia emerjénsia ba família vítima hamutuk na’in-ualu kompostu mane na’in-rua no feto na’in-neen.
Nesesidade bázika ne’ebé Governu apoia mak hanesan hahaan no ekipamentu dapur hanesan fós saku-rua, ikan lata dós ida, supermi dós ida, susu-ben dós-rua, mina bimoli masa-rua, biskuitu, kafé inklui materiál dapur hanesan sana, taxu, bikan, kopu, kanuru no seluk tán.
“Sei halo verifikasaun ba uma refere hodi kontinua prosesu ba nasionál,” Nelson akresenta.
Diresaun protesaun sivíl no jestasaun dezastre naturál Baucau iha trimestre dahuluk rejista vítima hamutuk uma-kain 66 kompostu postu Baucau Vila anin sobu uma 25, inséndiu uma-ida no rai halai rua.
Hosi parte postu administrativu Vemasse akontese inséndiu uma-ida, Laga akontese anin sobu uma-lima, Quelicai akontese anin sobu uma-hitu, Venilale akontese anin sobu uma-neen no Baguia akontese anin sobu uma-18 inklui insédiu uma-ida.
Jornalista : Natalino Belo
Editór : Evaristo Soares Martins
