ELEISAUN, HEADLINE, MUNISÍPIU, NASIONÁL, VIQUEQUE

STAE Viqueque simu materiál kaixa 11 ba eleisaun prezidensiál segunda volta

STAE Viqueque simu materiál kaixa 11 ba eleisaun prezidensiál segunda volta

Materiál eleisaun segunda volta iha salaun apuramentu administrasaun Viqueque, kuarta (13/04). Imajen TATOLI/Vitorino Lopes da Costa

VIQUEQUE, 13 abril 2022 (TATOLI)—Brigada Sekretariadu Tékniku Administrativu Eleitorál (STAE) akampaña ho Ofisiál Komisaun Nasionál Eleisaun (CNE, sigla portugés) Viqueque, kuarta ne’e, simu ona materiál eleisaun prezidensiál segunda volta, iha salaun apuramentu, Viqueque.

“Ohin ita lori materiál sensitivu no la sensitivu to’o iha munisípiu Viqueque, liuliu buletin votu hamutuk kaixa 11,” Diretór STAE Viqueque, Humberto Fernandes, hateten ba Agência TATOLI, iha salaun munisipál.

STAE simu livru hamutuk 1.322 no folla 66.100 inklui materiál la sensitivu hanesan tinta no lista vontante.

“Aban ita hahú konvida fiskál kandidatura na’in-rua hodi halo verifikasaun no pakotementu ba buletin votus durante loron-lima iha munisípiu. Nune’e, iha loron 18 abril STAE halo distribuisaun materiál ba sentru votasaun 92 no estasaun votu 110,” nia akresenta.

Notísia relevante: STAE Viqueque simu materiál sensitivu kaixa 23 ba Eleisaun Prezidensiál

Polísia Nasionál Timor-Leste (PNTL) munisípiu Viqueque sei halo seguransa másimu ba materiál sira  to’o distribui ba sentru votasaun estabelesidu.

Materiál hirak ne’e to’o iha Viqueque iha tuku 17:27, akompaña hosi Diretór CNE no Diretór STAE Viqueque no hetan seguransa másimu hosi parte Polísia.

Tuir dadus, númeru eleitór Eleisaun Prezidensiál 2022 iha munisípiu Viqueque hamutuk 58.421, kompostu hosi mane 29.675 reprezenta 51% no feto 28.746 reprezenta 49%.

Iha eleisaun primeira volta iha loron 19 marsu iha munisípiu Viqueque, eleitór ne’ebé la partisipa eleisaun hamutuk 14.629, nune’e CNE esforsu hodi fahe informasaun liuhosi meiu komunikasaun hodi sidadaun sira  ne’ebé la partisipa eleisaun primeira volta bele partisipa fali.

Tuir dadus iha munisípiu Viqueque, eleitór ne’ebé rejistadu hamutuk 57.881, enkuantu partisipa eleisaun 43.252 reprezenta 74,73%.

Jornalista : Vitorino Lopes da Costa

Editora      : Julia Chatarina

iklan
iklan

Leave a Reply

iklan
error: Content is protected !!