VIQUEQUE, 19 abril 2022 (TATOLI)—Administradór postu Uatulari, munisípiu Viqueque, Manuel do Rosário, iha esperansa Kandidatu Prezidente Repúblika (PR) eleitu ba períodu 2022-2027 bele kolabora di’ak ho órgaun soberanu sira ba interese Estadu.
“Ha’u espera Kandidatu Prezidente Repúblika nu’udar aman nasaun tenki serbisu hamutuk ho parte hotu, labele sai opozisaun ba malu, keta sai opozisaun ba Parlamentu Nasionál no órgaun juridisiál. Órgaun haat ne’e tenki koopera malu di’ak hodi estabelese governasaun di’ak no asegura estabilidade iha rai-laran,” Autoridade postu hateten ba Agência TATOLI, iha postu Uatulari, tersa ne’e.
Notísia relevante: STAE Viqueque distribui materiál eleisaun segunda volta ba sentru votasaun
Aleinde ne’e, nia husu PR eleitu kolabora di’ak ho Governu no tau hanoin hamutuk hodi kria programa tuir nesesidade povu.
“Kandidatu ne’ebé sai Prezidente Repúblika karik labele hamosu krize de’it, maibé tenki halakon krime no hamosu dezenvolvimentu iha rain ida-ne’e,” nia akresenta.
Nia mós husu atu tau-matan ba estrada ligasaun Baucau-Viqueque bá postu Uatulari no Uatucarbau.
Tuir Autoridade postu ne’e, presiza mós moderniza sistema agrikultór atu povu sira bele hasa’e produsaun no aumenta kresimentu ekonómika rai-laran, nune’e hamenus importasaun ai-han.
Nia iha espetativa ba PR eleitu, atu kolabora ho Governu hodi kualifika kualidade eskolár sira no tau-matan ba kondisaun infraestrutura eskolár.
“Presiza prepara mós kondisaun ba ajente saúde sira nune’e komunidade iha área remota bele hetan tratamentu saúde ho di’ak. Prezidente Repúblika eleitu tenke fó hanoin ba Governu hodi instala liña eletrisidade ba populasaun ne’ebé oras ne’e daudaun sei tuur iha nakun laran inklui mós saneamentu,” nia tenik.
Jornalista : Vitorino Lopes da Costa
Editora : Julia Chatarina
