iklan

BAUCAU, ELEISAUN, HEADLINE, MUNISÍPIU, POLÍTIKA

Eleitór na’in-393 vota iha HoREX Baucau

Eleitór na’in-393 vota iha HoREX Baucau

Paseinte sira iha Horex Baucau ezerse direitu votu iha eleisaun prezidensiál volta daruak, tersa (19/04). Imajen Tatoli/Natalino Belo.

BAUCAU, 19 abríl 2022 (TATOLI) – Eleitór hamutuk na’in-393 ne’ebé rejistu iha lista internadu kompostu funsionáriu no pasiente inklui família pasiente ezerse ona direitu votu iha Hospital Rejionál Eduardo Ximenes (HoREX) Baucau.

Xefe Departamentu Rekurusu Umanu HoREX Baucau, Sebastião Amaral, esplika totál eleitór iha HoREX hamutuk na’in-393 kompostu funsionáriu profisionál saúde, seguransa hamutuk na’in-239, enkuantu pasiente no família pasiente hamutuk na’in-154.

“Lista aumenta mak funsionáriu tanba antes ne’e sira protesta relasiona ho dirijente sira la rejista naran iha lista internadu nune’e maioria funsionáriu vota hotu iha HoREX, hamutuk na’in-239,” Diretór Rekursu Umanu HoREX Baucau hateten iha Vila Nova, tersa ne’e.

Prosesu votasaun ne’ebé la’o iha HoREX, katak eleitór sira ezerse direitu tuir situasaun no kondisaun pasiente nian hanesan lori tuir urna ba fatin toba pasiente no bolu naran iha lista antes ezerse direitu.

“Tuir lei loron-10 antes ita submete ona lista votante ba STAE munisípiu,” Sebastião akresenta.

Diretór Sekretáriadu Tékniku Administrasaun Eleitorál (STAE) Baucau, Lúcio Freitas Salvador hateten, númeru lista eleitór internadu barak nune’e STAE deside realiza eleisaun sedu iha HoREX hosi estasaun votu hosi sentru votasaun Tirilolo tanba tuir kondisaun pasiente.

“Tanba barak liu kuaze na’in-400 entaun sedu atu nune’e urna sei lori tuir ba pasiente sira,” Lúcio hateten.

Paseinte sira iha Horex Baucau ezerse direitu votu iha eleisaun prezidensiál volta daruak, tersa (19/04). Imajen Tatoli/Natalino Belo.

Iha eleisaun prezidensiál volta dahuluk mosu dezintendimentu entre jestór HoREX ho STAE Baucau tanba naran eleitór internadu balun la rejista iha lista internadu nune’e labele ezerse direitu votu tanba tuir lei eleitóral katak antes loron-sanulu eleisaun rejista internadu tenke submete ona ba STAE.

Nune’e, STAE deside família pasiente no pasiente sira foun ne’ebé naran la rejista antes loron-sanulu sei lakon direitu votu tanba bazea ba  Dekretu Governu númeru 10/2022 artigu 1 kona-ba ámbitu aplikasaun katak bainhira lista naran eleitór (internadu) submete ba STAE to’o loron-sanulu antes loron eleisaun.

Diretór STAE Baucau afirma situasaun jerál iha Baucau la’o hakmatek hahú hosi abertura sentru votasaun no husu ba eleitór sira atu partisipa másimu iha eleisaun nune’e bele vota tuir konsiénsia hodi hili prezidente repúblika ne’ebé tuir mandatu períodu ba tinan-lima.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!