iklan

HEADLINE, MUNISÍPIU, OÉ-CUSSE (RAEOA), SEGURANSA

Ekipa dezastre naturál RAEOA apoia vítima inséndiu iha Nítibe

Ekipa dezastre naturál RAEOA apoia vítima inséndiu iha Nítibe

Ekipa dezastre Naturál RAEOA oferese ona apoia ba vítima inséndiu iha Nítibe. Imajen mídia SEPS.

OÉ-CUSSE, 21 abríl 2022 (TATOLI) – Ekipa dezastre naturál iha Rejiaun Administrativa Espesiál Oé-Cusse Ambeno (RAEOA), kinta ne’e oferese ona apoia ai-han ba vítima inséndiu inan faluk, Lucia Poto, ne’ebé ahi han nia uma iha aldeia Kuanobe, suku Ban-Afi, sub-rejiaun Nítibe, iha loron kuarta 20 abríl liubá.

Ekipa dezastre naturál ne’e mai hosi Sekretariu Protesaun Sívil (SEPS), Bombeiru, Word Food Programme (WFP) hamutuk ho Sekretariu Asuntu Edukasaun Solidariedade Sosiál no Inkluzaun.

“Ohin, protesaun sívil hamutuk ho parseiru sira oferese ona apoia materiál food item, non food item ba vitíma inséndiu ahi-haan nia uma iha suku Ban-Afi, tanba iha kuarta madrugada ema deskoñesidu sunu nia uma,” Koordenadór Jestaun Risku Dezastre Naturál RAEOA, Domingos Meni, informa ba Agência Tatoli iha Oé-Cusse.

Tuir nia, hafoin insidente ne’e akontese, parte SEPS iha RAEOA, simu kedas proposta hosi autoridade komunitária suku Ban-Afi, husu tulun atu rekupera netik vítima hosi dezastre ne’e.

Tán ne’e maka apoia ne’e ohin ekipa dezastre oferese mak hanesan, food item komposta hosi supermi kaixa ida, ikan-lata kalén 25, mina bimoli jerigen ida, biscuit kalén ida, susubeen plástiku rua no foos saku rua (2), nomós non food item, hanesan família pakote ida, manta no básia inklui sasán dapur nian.

Iha biban ne’e, vítima inan faluk, Lúcia Poto, ho mataben agradese ekipa dezastre natural tanba hetan ona tulun, nune’e bele uza ba nesesidade loron-loron nian.

“Obrigadu ba ajuda ne’ebé ohin mai oferese ona ba ha’u, susar tebes hetan dezastre boot ne’e, tanba ha’u-nia sasán barak, liuliu hahán tanba foin kolleta batar no haree, maibé la konsege salva tanba dezastre ne’e akontese iha dadeersan madrugada, ema barak toba ona,” nia katak.

Notísia relevante: PNTL kontinua buka-tuir suspeitu sunu uma iha RAEOA

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!