iklan

JUSTISA, HEADLINE, MUNISÍPIU, OÉ-CUSSE (RAEOA), SEGURANSA

PNTL RAEOA prosesa ona joven na’in-haat ba tribunál

PNTL RAEOA prosesa ona joven na’in-haat ba tribunál

Komandante PNTL RAEOA, Superintendente, Mateus Assunção Mendes. Imajen Tatoli/Abílio Elo Nini.

OÉ-CUSSE, 22 abríl 2022 (TATOLI) – Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA), daudaun ne’e prosesa ona joven na’in-haat ba Tribunál Distritál Oé-Cusse tanba prátika krime eleitorál iha eleisaun prezidensiál volta dahuluk.

Komandante PNTL RAEOA, Superintendente Xefe, Mateus Mendes Assunção, hatete, kazu komete krime eleitorál ne’e akontese iha eleisaun volta dahuluk, iha sentru votasaun Noapai, suku Cunha, sub-rejiaun Pante Makasar, tanba asalta malu.

“Problema ne’e tama iha PNTL iha primeira ronde, akontese iha sentru votasaun Noapai, envolve joven na’in-haat tenta atu asalta kazál ida atu ba vota, ne’ebé sira la responde maibé foti asaun direitamente halo keixa mai iha polísia, kazu sira-ne’e hotu, tribunál Oé-Cusse delega ona kompeténsia mai iha polísia servisu investigasaun, no servisu tomak konklui ona nia rezultadu pasa ona ba tribunál,” nia ba jornalista sira iha Kuartél PNTL Oé-Cusse, sesta ne’e.

Komandante ne’e, fó sai katak, iha kampaña volta daruak PNTL rejista kazu ida iha suku Taiboko, bainhira kandidatu númeru sorteiu 1 realiza mini kampaña, joven na’in-ida lanu perturba iha fatin kampaña.

Nune’e rezulta estraga ekipamentu eletróniku liuliu fiu ne’ebé liga ba sound system, hamosu barullu iha mini kampaña ne’e, nune’e, Ofisiál Polísia Suku (OPS) identifika kedas relata mai komandu no daudaun ne’e nia prosesu la’o hela.

Tuir nia katak, iha eleisaun volta dahuluk PNTL rejista kazu rua no volta daruak rejista kazu rua hamutuk kazu haat mak akontese iha Oé-Cusse.

“Eleisaun primeiru, ida mak asalta malu iha suku Cunha, no ema deskoñesidu sunu uma xefe aldeia Lamasin iha iha suku Bene-Ufe, sub-rejiaun Nítibe maibé to’o agora seidauk identifika suspeita ruma, iha segunda volta, kazu suku Taiboko no sunu uma iha aldeia Kunobe, suku Ban-Afi, hanesan mós rezultadu seidauk identifika nia motivu loloos,” nia katak.

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!