iklan

EDUKASAUN, BAUCAU, HEADLINE, MUNISÍPIU

Programa merenda eskolár iha Baucau hahú maiu

Programa merenda eskolár iha Baucau hahú maiu

Servisu Edukasaun Munisípal Baucau realiza enkontru diseminasaun informasaun kona-ba preparasaun implementa programa merenda eskolár iha Baucau. Imajen Tatoli/Natalino Belo.

BAUCAU, 22 abríl 2022 (TATOLI ) – Servisu Edukasaun Munisipál Baucau sesta ne’e, realiza enkontru ikus ho dirijente eskola sira ho objetivu atu fahe informasaun kona-ba implementasaun programa merenda eskolár ne’ebé tuir planu sei realiza iha inísiu fulan-maiu.

Diretór Servisu Edukasaun Munisipál Baucau, Augosto Ornai Ximenes hateten, ne’e bazea ba oreintasaun Ministériu Admistrasaun Estatal (MAE) liuhosi karta sirkulár númeru 01 kona-ba ezekusaun orsamentu merenda eskolár ne’ebé aloka hosi autoridade munisipál no servisu admistrasaun munisipál sira.

“Espera iha loron-sia fulan-maiu bainhira hahú inisiu aprenidijazen períodu daruak programa merenda eskolár mós bele implementa ona,” Diretór Edukasaun Baucau hateten iha loron-sesta ne’e.

Liuhosi enkontru refere, dirijente eskola sira sei simu informasaun kona-ba lala’ok atu implementa programa merenda eskolár ne’e.

Orsamentu ba programa refere transfere ona ba konta bankária kada ensinu bázika sira tuir aprovasaun orsamentu ne’ebé aloka ba Baucau ho durasaun loron-70 efetivu, maske totál loron ba programa merenda eskolár hamutuk 191.

Edukasaun Baucau identifika no rejista preokupasaun hosi dirijente eskola sira kona-ba fasilidade hanesan dapur, ekipamentu te’in nune’e parte edukasaun husu atu bele implementa programa refere tuir kondisaun eskola idak-idak hanesan harii dapur provizóriu hodi hein solusaun hosi nasionál.

“Ita garante katak implementasaun programa merenda eskolár sei susesu maske hasoru difikuldade,” Augosto akresenta.

Tótal orsamentu ba programa merenda eskolar tinan 2022 iha autoridade munisipál Baucau ba liuhosi transferénsia públika hamutuk $ 714.187.

Enkuantu, tótal eskola  ne’ebé sai benefisiáriu hamutuk 209, kompostu eskola ensinu pre-primaria 29, ensinu bázika públiku hamutuk 111 no ensinu bázika Katólika hamutuk 67 hosi totál estudante 32.307.

Jornalista   : Natalino Belo

Editór         : Evaristo Soares Martins

iklan
iklan

Leave a Reply

iklan
error: Content is protected !!