F-FDTL mantein halo kooperasaun militár ho nasaun CPLP
DILI, 23 abríl 2022 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul Falur Rate Laek, hateten F-FDTL hakarak mantein kooperasaun militár ho nasaun Comunidade Paises Língua Portuguesa (CPLP).
“Ha’u-nia mensajen ohin mak ne’e, ita hakarak kria kooperasaun, hodi kontinua mantein serbisu hamutuk ho nasaun membru CPLP hodi nune’e hakat ba oin,” Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul ‘Falur Rate Laek’, hateten ba jornalista sira iha ámbitu enkontru prezidensiál militár CPLP ba dala-XIII via virtuál ne’ebé halao Kaurtel Jeneral F-FDTL, Fatuhada, sábadu ne’e.
Tinan ne’e, nia informa, Timor-Leste mak prezide reuniaun prezidensiál iha téknika militár CPLP nian ba dala-XIII iha Timor-Leste no tuir loloos reuniaun ne’e partisipa hosi militár nasaun CPLP maibé tanba de’it COVID-19, Timor-Leste halo de’it liuhosi virtual.
Durante enkontru prezidensiál militár CPLP ba dala-XIII, nia informa, sira ko’alia kona-ba estudu ánalize estratéjiku politiku no militár nomós konjutura mundiál.
“Ita atu halo desizasaun sira atu involve ita-nia operasaun pás no apoiu umanitáriu, esperiénsia, ita iha tiha ona, halo ona ho Portugal ho Lebanon. Agora, ita hakarak reforsa ida-ne’e,” nia dehan.
Kestaun seluk mak diskute koopersaun oinsá forsa armada Timor-Leste bele involve iha atividade SEMIK, atividade sivil militár iha nivél CPLP nian.
Aleinde ne’e, F-FDTL hakarak haforsa kooperasaun forum saúde militár nian no koléjiu militár oinsá mak formasaun ba militár no ezersísiu konjuntu militár-nian, ne’ebé F-FDTL kontinua halo kooperasaun ida-ne’e inklui diskute pontu 13.
Liuhosi enkontru ne’e ko’alia kona-ba estabelesimentu pájina militár CPLP nian, nune’e membru nasaun CPLP bele akompaña direta atividade kada nasaun membru CPLP.
Tanba, tuir nia, membru nasaun CPLP sira hanesan Portugal kontinua fó tulun ba forsa armada Timor-Leste iha área treinamentu operasaun espesiál iha akademia militár, nune’e mós Brazil fó apoia treinamentu militár ba polísia militár Timor-Leste nian, depois Guinebisau no São Tome Prínsipe atu mai partisipa iha ezersisiu apoia pás iha Timor-Leste.
Tanba ne’e, nia dehan, FALINTIL-Forsa Defeza Timor-Leste (F-FDTL) komprometidu kontinua serbisu hamutukho nasaun CPLP hodi hakat ba oin.
Enkuantu nasaun membru CPLP mak hanesan Brazil, Portugal, Angola, Cabo Verde, Guiné-Bisau, Guiné Equatorial, Moçanbique, São Tomé e Prinsicpe no Timor-Leste.
Jornalista : Natalino Costa
Editór : Cancio Ximenes
