OÉ-CUSSE, 25 abríl 2022 (TATOLI) – Institutu Nasionál Administrasaun Públika (INAP), fasilita formasaun iha área haat ba funsionáriu sira iha Rejiaun Administrativa Espesiál Oé-Cusse Ambeno (RAEOA), hodi hasa’e abilidade ba atendimentu administrasaun públika.
Diretór nasionál INAP, José Aroujo Chan, esplika INAP ba Oé-Cusse atu responde pédidu hosi Prezidente Autoridade RAEOA hodi fornese formasaun iha área haat, kona-ba lideransa, jestaun eskritóriu, jestaun protokolu no Informasaun Teknolojia (IT).
“Maibé iha pedidu hosi Prezidente Autoridade atu fornese formasaun iha área neen, maibé rua ami labele responde iha tempu agora, tán ne’e ami fornese formasaun haat ba lideransa, jestaun eskritóriu, jestaun protokolu nomoos IT,” Diretór nasionál INAP, José Aroujo Chan, hateten segunda ne’e iha RAEOA.
Formasaun rua ne’ebé parte INAP la konsege realiza mak hanesan, planeiamentu no jestaun projetu, tanba kestaun rua ne’e, INAP tenke koordena ho Ministériu Finansa (MF) nomoos ho UPMA, tanba sira mak tenke fó formasaun tanba área téknika nian.
Nia informa, iha formasaun jestaun lideransa, eskritóriu no jestaun protokolu, sei hala’o durante loron lima hahú hosi segunda 25 abríl to’o sesta 29 semana ne’e ho totál oras 40, purtantu kona-ba IT sei realiza durante fulan rua, hahú abríl ne’e to’o juñu.
Nune’e mós iha formasaun jestaun lideransa nian, envolve formandu hamutuk na’in-32, ba jestaun eskritóriu ho protokolu kada formasaun envolve formandu na’in-21, ba IT envolve formandu na’in-46.
“Ita espera katak depois formasaun ne’e, ita hatene katak RAEOA nia estutu espesiál, atubele kapasita atu hasa’e sira-nia abilidade, sira-nia koñesimentu nune’e iha futuru sira-bele fornese atendimentu ne’ebé di’ak ba iha komunidade, tanba hanesan funsionáriu públiku sira-nia kna’ar mak fornese atendimentu,” nia espera.
Formandu Domingos Marques, atuál jestór sub-rejiaun Oésilo, orgullu tanba liuhosi formasaun ne’e bele benefísia ba iha atendimentu administrasaun públika.
“Ohin ami foin komesa abertura ba formasaun, atu kapasita ami tuir idak-idak nia posizaun hanesan, ami jestór iha fatin administrasaun, sente orgullu tanba formasaun ida ne’e tinan lima foin realiza dala-ida,” nia orgullu.
Iha formasaun ba área haat ne’e, fahe ba fatin haat, ekipa ida realiza formasaun iha Sekretariu Rejionál ba Asuntu Administrasaun Estatál (MAE), ekipa iha realiza iha kampus DIT Oé-Cusse, ekipa ida iha salaun jestór sub-rejiaun Pante Makassar no ekipa ida hala’o iha salaun edukasaun Oé-Cusse iha Santa Roza.
Jornalista : Abílio Elo Nini
Editór : Evaristo Soares Martins
