Durante iha Malazia jogadór sira konsumu ai-han nutritivu
MALAZIA, 28 abríl 2022 (TATOLI) – Kompleta ona loron neen selesaun nasionál Timor – Leste U-23 hela iha Malazia hodi halo treinamentu no jogu amigável hafoin dezloka ba Hanoi Vietname hodi partisipa Sea Games.
Durante halo preparasaun iha Malazia, selesaun sira hetan akompanamentu di’ak tebes hosi treinadór prinsipál, Fabio Maciel da Silva, ho nia ekipa kompostu hosi asistente treinadór no médiku espesiál ba jogadór sira.
“Hahan nutrisaun di’ak ba jogadór sira ne’e importante tebes, ida ne’e mak ami treinadór sira nia hakarak, jogadór sira bele treinu makas iha kampu laran mais hahan la di’ak sira sei la halo buat ida, maibé agora hahan ne’ebé di’ak tebes ba sira atu han”, dehan Fabio ba Agência TATOLI iha kampu PKNS Malazia, kinta ne’e.
Nia dehan ho aihan ne’ebé di’ak ba jogadór sira han kada loron deskansa di’ak iha otél ajuda tebes jogadór sira bele hatudu jogu di’ak kontra adversáriu sira.
“Buat hotu la´o di’ak tebes hodi fó kontente ba jogadór sira nia família, ba ema hotu no povu Timor – Leste”, revela.
Hahan ne’ebé kada loron jogadór sira han mak hanesan, naan, ikan, aifuan modo tahan, paun, keizu no seluk tan.
“Alimentasaun ba jogadór sira laiha diferente hosi uluk no agora, nafatin hanesan, maibé iha Malazia ne’e di’ak no laiha diferente atendimentu buat hotu lao tuir saida mak iha ona, laiha diferente tipu alimentasaun ba jogadór sira”, afirma.
Tanba ne’e treinamentu durante semana ida ona lao di’ak tebes no laiha problema.
Dadaun ne’e jogadór sira hala´o treinamentu oinsa bele halo kontra no atake ba adversáriu no tenta halo suta makas ba guarda rede adversáriu nian iha kampu PKNS Malazia.
Ho nune’e kapitaun ekipa Filomeno Junior hafoin remata treinamentu hateten ba Agência TATOLI katak durante loron haat ona treinamentu la´o di’ak no iha duni kondisaun ba sira hodi prepara an di’ak hasoru Sea Games.
“Ami nia treinu di’ak tebes, kondisaun di’ak hotu ba ami, hanesan hahan mós estabil iha otél ami han loron ida dala haat, hahan ne’ebé nutirsaun duni ba ami nia saúde”, katak.
Tuir oráriu Sea Games, iha jogu futeból Timor-Leste sei kontra Filipina, Vietnam, Myanmar no Indonézia.
Tanba ne’e, ekipa Timor – Leste sei aranka ba Vietname iha 03 maiu ne’e.
Jornalista: Hortencio Sanchez
Editór : Zezito Silva
