iklan

EKONOMIA, HEADLINE, IMAJEN, INKLUZAUN SOSIÁL, MUNISÍPIU, OÉ-CUSSE (RAEOA)

EBC Palaban hahú promove produtu lokál iha merenda eskolár

EBC Palaban hahú promove produtu lokál iha merenda eskolár

EBC Palaban iha RAEOA hahú promove produtu lokál iha programa merenda eskolár. Imajen Tatoli/Abílio Elo Nini.

OÉ-CUSSE, 27 abríl 2022 (TATOLI) – Ensinu Báziku Sentrál (EBC, sigla portugés) Palaban, Rejiaun Administrativa Espesiál Oé-Cusse Ambeno (RAEOA) hahú promove produtu lokál hanesan, ai-farina, fehuk, talas no hudi iha programa merenda eskolár faze dahuluk tinan fiskál 2022.

Diretór EBC Palaba, Vincencio Cono, esplika, merenda eskolár iha EBC Palaban realiza ona estudante 30 siklu, hodi goza sira-nia direitu tanba ne’e orsamenta ona iha Orsamentu Jerál Estadu kada tinan, kada estudante ida iha direitu atu goza sentavu $0,25 kada loron.

Tanba ne’e, inisiativa hosi eskola uza fundu ne’e aranja produtu lokál hosi to’os na’in-sira iha área rurál hanesan, talas, hudi, ai-farina, fehuk no batar funan, hodi envolve iha programa merenda eskolár, nune’e estudante sira bele konsumu.

Diretór EBC Palaban iha RAEOA, Vincencio Cono. Imajen Tatoli/Abílio Elo Nini.

“Ami hahú ona iha segunda ne’e, maioria ami uza de’it produtu lokál, hanesan fehuk, ai-farina, talas, husi no batar funan, hahán sira-ne’e ami ba hola iha komunidade sira-ne’ebé kuda iha to’os, tanba ita tenke hahú promove rasik ita-nia produtu iha eskola, duké ba hola fali sasán importasaun hanesan xineza sira fa’an, di’akliu promove rasik ita-nia hahán orijinál hosi inan-aman mak kuda ona iha to’os,” Vincencio Cono, hatete iha EBC Palaban, Oé-Cusse, tersa ne’e.

Tuir nia, kustume ida-ne’e persiza konsidera tanba hatoman jerasaun sira, atu koñese di’ak liután, produtu orijinál Timor nian, tanba iha era agora, hahán fabrikadu barak mak domina ona iha teritóriu nasionál, entaun iha nível kraik hanesan eskola-sira, tenke hafolin ita-nia produtu lokál sira.

Daudaun ne’e, estudante rejistadu iha EBC Palaban iha tinan fiskál 2022 hamutuk 688, ho orsamentu ne’ebé aloka mai hosi edukasaun hamutuk $4,128, hodi finansia merenda eskolár ba loron-24, kada semana realiza ba loron neen (6), hahú segunda to’o sábadu, maibé estudante sira só hemu de’it xá ho produtu lokál-sira hanesan ai-farina, fehuk, talas, hudi no batar funan.

“Ida-ne’e faze dahuluk nian, bainhira tama ba faze daruak mak foin bele haan, konforme hosi alokasaun foos hosi parte edukasaun ninian,” nia katak.

Nia informa, iha inísiu fulan-janeiru to’o marsu tinan ne’e, programa merenda eskolár iha Oé-Cusse paradu, agora mak foin realiza.

Antes ne’e Diretór Edukasaun RAEOA, Daniel Maunu, hatete, programa merenda eskolár ba tinan ne’e, foin mak realiza bazea orsamentu ne’ebé planeia ona, atu implementa ba eskola 82 ho totál estudante rihun 18.097, goza merenda durante loron 30 efetivu iha faze daduluk ne’e, komposta hosi ensinu pré-eskolár eskola 11 no ensinu báziku hamutuk 71.

Fonte orsamentu ne’e edukasaun RAEOA hetan apoia mai hosi Ministériu Edukasaun, Juventude no Desportu (MEJD) tranSfere liuhosi konta bankÁria RAEOA-ZEESM nian ho valór hamutuk $111,697.00, hodi finansia programa merenda eskolár iha Oé-Cusse ba loron 30.

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!