MALAZIA, 29 abríl 2022 (TATOLI) – Ekipa Selesaun U-23 Timor-Leste liuhosi jogu amigável konsege manan ekipa selesaun nasionál Malazia U-23 iha nia uma rasik ho eskore 2-1.
Jogu ba ekipa rua ne’e hala´o iha Estádiu UiTM Malazia sesta kalan ne’e iha oras 21:15 oras Malazia nian.
Menutu primeiru hahú ekipa rua lansa kontra no atake ne’ebé makas ba malu ho ambisaun ne’ebé bo´ot hakarak gaña vitória ba ida-idak nia ekipa.
Malazia halo jogu ofensivu hodi lansa kontra no atake makas ba lina Timor-Leste nian maibé jogadór Timor-Leste nian la fó fatin atu Malazia ultrapasa tama liu lina Timor-Leste nian.
Jogu Timor-Leste nian halao ho kalma ka bola badak pasa hosi ain ba ain la iha ambisaun halo golu bainhira seidauk iha oportunidade.
Ho tátiku no abilidade ekipa rua ne’e iha primeira parte la termina golu ruma ba ekipa rua ne’e no rezultadu hela ho 0-0.
Dolar ba segunda parte ekipa rua nafatin lansa kontra no atake ba malu, treinadór Timor-Leste nian, Fabio Maciel da Silva, estuda hetan ona Malazia nia jogu hodi halo mudansa ba jogu to´o ikus iha minutu 55 jogadór Elias Mesquita (7) lansa golu ida hatur rezultadu ba 1-0.
Golu ne’e halo treinadór Malazia nian Bradley Jhon Maloney tur la metin hamrik iha kampu ninin hodi orienta jogadór sira muda estratejia nune’e mudansa ne’e la hela de’it hanesan mudansa tanba iha minutu 66 jogadór Malazia Faiz Amer (3) hetan oportunidade hosi nia kolega lansa suta dook ida iha lina liur tama liu ba rede Timor-Leste nia laran halo guarda rede Junildo Pereira laiha konsentrasaun hodi salva rezultadu muda ba 1-1.
Jogu sai manas liu tan, treinadór Timor-Leste Fabio la nonok de’it iha fatin nafatin orienta jogadór sira hodi joga ho kalma tuir tátiku ne’ebé mak iha, rezultadu hatudu pozitivu duni tanba iha minutu 70 bola barullu iha liña Malazia nia oin guarda rede Malazia Muhammad Fadhil (1) la konsege kontrola bola ho di’ak fó oportunidade ba jogadór médiu Timor-Leste Jhon Frith (6) hadau bola hodi halo golu muda rezultadu ba 2-1 iha minute 71.
Golu ne’e hanesan golu ikus ba ekipa rua ne’e tanba too jogu termina laiha tan golu ruma mak akontese ba ekipa rua.
Treinadór Timor-Leste Fabio, hateten jogu hasoru Malazia jogadór sira hatudu jogu ne’ebé mak di’ak hodi manán duni jogu ne’e maske difisíl.
“Ohin jogu ne’ebé di’ak tebes, jogu ne’ebé prepara ba Sea Games nian, maibé ohin iha uma Malazia nian ita nia ekipa konsege manán sira, maske iha minutu primeiru zero-zero, maibé ba iha segunda parte ita konsege halo mudansa jogu konsege halo duni golu no Malazia mós responde kedan golu ida ikus ita responde tan to´o hotu ita manán duni”, ferefe treinadór.
Nia dehan, ekipa U-23 jogu iha tempu ba kotuk hamutuk ualu hasoru nasaun Korea Súl, Filipina, Vietname no seluk tan, halo jogadór sira iha ona esperiensia hodi joga no ba oin ekipa Timor-Leste sai ekipa ida ne’ebé eselente.
Hosi rezultadu ne’ebé hasoru Malazia fó konfiansa boot ba nia hodi partisipa iha Sea Games tanba jogadór sira joga fiar malu no hatudu jogu ne’ebé di’ak iha kampu laran.
“Ha’u fiar ita nia ekipa maske iha Sea Games hasoru ekipa ne’ebé todan tanba jogadór sira ladun deskansa tanba jogu ida hotu kontinua kedan jogu seluk nune’e hela de’it to´o hotu, ida ne’e dezafiu ida ne’ebé difisíl maibé jogadór sira tenke prontu no halo preparasaun kiik ne’ebé di’ak ho ha’u nia fuan tomak atu sira forsa hodi hasoru jogu sira ne’e atu fó kontente ba povu Timor-Leste” nia dehan.
Iha sorin seluk kapitaun ekipa, Filomeno Junior, hateten jogu ne’ebé sira hala´o durante minutu 90 di’ak tebes konsege fó vitória ba Timor-Leste.
“Jogu ohin ne’e di’ak tebes, parabéns mós ba ekipa Malazia ne’ebé hatudu jogu ne’ebé di’ak hotu tanba iha primeira parte ami la konsege domina bola, maibé iha segunda parte ami konsege domina fali bola to´o ita manán”, nia relata.
Jogu ne’e dirije hosi árbitru Ahmad Zuhaidi Dzulkifli, juiz liña Barzul Hissam Bin Zainul, Mohd Shukri Bin Haron no árbitru rezerva Hong Man Jun.
Jornalista: Hortencio Sanchez
Editór : Zezito Silva
