Governu aprova orgánika Sekretaria Estadu ba Komunidade Timor-oan iha Rai-li’ur
DILI, 17 maiu 2022 (TATOLI)–Governu liuhosi reuniaun Konsellu Ministru (KM) estraordinária, tersa ne’e, aprova projetu dekretu-lei, ne’ebé aprezenta hosi Primeiru-Ministru, Taur Matan Ruak, kona-ba orgánika Sekretaria Estadu ba Komunidade Timor-oan iha Rai-li’ur.
Sekretaria Estadu ne’e sei tutela hosi Primeiru-Ministru, ne’ebé sei buka atu hatán ba nesesidade timor-oan sira ne’ebé hela iha rai-li’ur.
“Objetivu harii Sekretaria Estadu foun ida-ne’e atu hametin lasu ne’ebé liga ba sidadaun timor-oan sira iha rai-li’ur no Estadu Timór. Ho servisu ne’e, hein katak sidadaun timor-oan ne’ebé hela iha rai-li’ur bele hetan asesu fasil liután ba servisu públiku importante lubun ida,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniuan ezekutivu, iha Palásiu Governu.
Notísia relevante: Governu estabelese Sekretáriu Estadu Komunidade Timor-oan iha Rai-Li’ur
Aleinde ne’e, sei iha funsaun hanesan atu fahe informasaun kona-ba prosesu dezenvolvimentu Timor-Leste hosi komunidade timor-oan sira iha rai-li’ur no mobiliza komunidade timor-oan sira ba promosaun Timor-Leste rai-li’ur.
Jornalista : Antónia Gusmão
Editora : Julia Chatarina
