iklan

EKONOMIA, HEADLINE, MUNISÍPIU, VIQUEQUE

BNCTL enkoraja setór privadu Viqueque halo investimentu ba setór produtivu

BNCTL enkoraja setór privadu Viqueque halo investimentu ba setór produtivu

BNCTL realiza semináriu ho tema ‘Papel setór bankária no setór privadu hodi promove dezenvolvimentu ekonomia nasionál’, iha Viqueque, tersa (28/06). Imajen Tatoli/Vitorino Lopes da Costa

VIQUEQUE, 28 juñu 2022 (TATOLI)–Banku Nasionál Komérsiu Timor Leste (BNCTL, sigla portugés), tersa ne’e, halo semináriu iha Viqueque ho tema ‘Papel setór bankária no setór privadu hodi promove dezenvolvimentu ekonomia nasionál’.

Biban ne’e, Diretór Ezekutivu Konsellu Administrasaun BNCTL, Brígido de Sousa, enkoraja setór privadu sira halo investimentu ba área produtivu sira hanesan agrikultura no turizmu iha munisípiu Viqueque.

“BNCTL ita hotu nian, uluk banku ne’e kiik maibé agora boot ona. Nune’e setór privadu bele hakbesik-an ba banku hodi asesu halo investimentu ba setór produtivu hanesan agrikultura no turizmu. Ita haree Viqueque poténsia ba turizmu hanesan parte Larigutu ninia paizajen furak tebes, tanba ne’e ita presiza halo guest house ruma hodi ema mai vizita karik bele hela hodi fó reseita ba ita,” Diretór Ezekutivu Konsellu Administrasaun, Brígido de Sousa, hateten ba Agência Tatoli, hafoin ramata semináriu, iha salaun evakuasaun Viqueque, tersa ne’e.

Notísia relevante: BNCTL prontu apoia kréditu ba emprezáriu Baucau

Aleinde ne’e, Timor-Leste poténsia halo negósiu iha setór produtivu tanba populasaun maioria moris ho ortikultura, pekuária, peska no turizmu.

“Setór sira-ne’e importante ba ita-nia dezenvolvimentu nasaun, liuliu dezenvolvimentu ne’ebé sustentabilidade. Ita hatene katak maioria rendimentu ka rekursu ba dezenvovilmentu mai hosi fundu petrolíferu. Enkuantu fundu petrolíferu sei iha ita tenke uza ho di’ak,”  nia akresenta.

Tanba ne’e, nia konsidera semináriu ne’e importante hodi rona sujestaun hosi autoridade no setór privadu sira ne’ebé sai autór prinsipál ba dezenvolvimentu ekonomia iha nasaun.

“Objetivu atividade ne’e hodi troka hanoin hosi setór bankária no setrór privadu, sira-nia espetativa hosi setór privadu no mós dezafiu sira ne’ebé hasoru  ho banku. Prevensaun saida maka banku bele interven ein termu apoiu finansiamentu ne’ebé ita-nia setór privadu sira presiza, atu nune’e setór privadu sira bele komunika ho banku saida mak atu kria,” nia hato’o.

Semináriu ne’e hodi rona parte hotu nia hanoin, nune’e BNCTL bele prepara planu negósiu ba tinan 2023 to’o 2028 ba dezenvolvimentu tinan-lima.

Iha fatin hanesan, Administradór munisípiu Viqueque, Januário Soares ‘Bolly’, hateten, semináriu ne’e importante tebes hodi bele loke oportunidade ba entidade relevante sira ne’ebé iha hanoin asesu fasilidade kréditu iha banku.

“Inisiativa ne’e bele loke ita-nia hanoin no asesu ba banku. Bainhira ita la rona buat ruma oinsá maka ita bele asesu ba banku hodi halo kréditu ruma,” nia haktuir.

Tuir sesnsu populasaun tinan 2015 ba empregu iha munisípiu Viqueque, empreza privadu hamutuk 418, kompostu hosi agrikutór autonómu 19.671 no  la’ós agrikultura autonómu 2.472.

Atividade ne’ebé realiza durante loron-ida hetan partisipasaun hosi autoridade lokál, Polísia Nasionál Timor-Leste (PNTL), profesór no setór privadu sira iha munisípiu Viqueque.

Jornalista   : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!