iklan

EKONOMIA, HEADLINE, MUNISÍPIU, OÉ-CUSSE (RAEOA)

Agrikultura RAEOA hahú distribui fini Membramo hasa’e kuantidade orijinál

Agrikultura RAEOA hahú distribui fini Membramo hasa’e kuantidade orijinál

Agrikultór suku Lalisuk hahù kolleta hare Membramo époka 2022. Imajen Tatoli/Abílio Elo Nini.

OÉ-CUSSE, 29 juñu 2022 (TATOLI) – Diresaun Rejionál Agrikultura Rejiaun Administrativa Espesiál Oé-Cusse Ambeno (RAEOA), liuhosi departamentu agrikultura bázika familiár, hahú distribui fini hare membramo atu prepara kuda ba époka 2022 nian hodi kontinua hasa’e kuantidade orijinál iha natar.

Sekretáriu Rejionál ba Asuntu Agrikultura, José Eta, informa, atividade produsaun fini hare membramo hahú faze realizasaun dahuluk iha kedas 2019, ho nia rezultadu amostra kilograma 400, nune’e tama ba iha faze daruak realiza iha 2021 ho rezultadu kolleta hetan kilograma 975, no tinan ne’e tama ba faze datoluk rezultadu produsaun sei kolleta iha novembru tinan ne’e.

“Kritéria apoiu fini ne’e ba natar na’in sira-ne’ebé maka aplika sistema jajar legowo 2:1, tanba daudaun ne’e tama ona faze preparasaun atu kuda iha jullu no sei kolleta iha outubru to’o novembru tinan ne’e, tan ne’e maka ita hahú distribui ba natar na’in-sira atu hasa’e kuantidade orijinalidade hare membramo nian,” José Eta, hatete iha Oé-Cusse, kuarta ne’e.

Nia informa, fini ne’ebé agrikultura distribui ba natar na’in sira mai hosi fini purifikasaun ne’ebé prodús ona iha tinan kotuk hamutuk kilograma 300.

Nune’e mós distribui adubu poknassa litru 21,96, supernassa kilograma 21,96, ormoníku litru 21,96, adubu orgániku kilograma 1000 (kompos) ba área natar ho luan área ektare 7.32 ho totál benefisiáriu hamutuk uma-kain 36 iha área natar kolomboe-Ana, suku Lifau.

“Objetivu ita distribui ba sira ho fini membramo no adubu orgánika ba natar na’in-sira atu mellora produsaun hare membramo iha RAEOA, liuliu iha suku Lifau ba área natar Kolomboe-Ana, tanba ikus-ikus ne’e hare tipu haat mak kahur-malu ona entaun ita identifika loloos nia orijinál atu prodús nia orijinál, atu halo purifikasaun tanba Oé-Cusse identiku ona ho membramo,” nia katak.

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!