DILI, 29 juñu 2022 (TATOLI)–Governu liuhosi reuniaun Konsellu Ministru, kuarta ne’e, delibera no aprova proposta alterasaun ne’ebé aprezenta hosi Ministru Obra Públika, Abel Pires da Silva, kona-ba kontratu públiku ba manutensaun estrada.
Konstratu públiku ne’e ho númeru ICB/018/MOPTC-2017 ba obra atu hadi’a no halo manutensaun ba estrada Dili-Ainaro, lote 2, trosu Laulara-Solerema, ho loron hahú obra 10 setembru 2018 no autorizasaun hodi aumenta despeza ne’ebé korespondente.
“Prazu ne’ebé prevee atu entrega obra ne’e aumenta tan loron 365, sura hahú hosi loron efetividade kontratu nian no sei termina iha loron 16 novembru 2022 no kustu aumenta tan $984.188,24, nune’e, tanba aumentu ne’e, valór finál kontratu nian sa’e ba $18.839.489,50,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu.
Notísia relevante: MOP prevee tokon $105 ba reabilitasaun estrada nasionál no rurál
Portavós Governu dehan, laiha implikasaun ba kustu tanba orsamentu hirak ne’e prevee antes ona no impedimentu sira ne’e mosu tanba situasaun ne’ebé akontese iha tempu sira liubá tanba ne’e maka aumentu loron no orsamentu.
Jornalista : Antónia Gusmão
Editora : Julia Chatarina
