iklan

DILI, HEADLINE, INTERNASIONÁL

Almério Lopes ho voluntáriu bá Ukráina hala’o misaun apoia Umanitária

Almério Lopes ho voluntáriu bá Ukráina hala’o misaun apoia Umanitária

Timoroan ho naran Almério Lopes, ho kolega voluntáriu sira hosi nasaun Portugál lori hela lojistika ba Militár Ukráina no povu iha liña Frente. Imajen/espesiál.

DILI, 30 juñu 2022 (TATOLI)– Timoroan ho naran Almério Lopes, ho fuan boot bá halo misaun apoia Umanitária iha nasaun Ukráina, ne’ebé daudaun enfrenta situasaun difisil tanba funu hasoru Rúsia.

“Ha’u akompaña funu entre Rúsia ho Ukránia ne’e. Ha’u iha hanoin ho vontade tomak hakarak voluntáriu atu halo misaun Umanitária hodi apoia povu Ukraianu ne’ebé reziste makas hodi defende nia-dignidade nasaun ka soberania,” Almério Lopes, informa ba Agência TATOLI via WhatsApp, kinta ne’e.

Notísia relevante:  Xanana husu líder mundiál promove diálogu hapara “funu entre Rúsia no Ukráina

Nia konta, prosesu nia to’o iha Ukránia tanba hetan ligasaun ho nia kolega voluntáriu sira hosi nasaun Portugál, ne’ebé daudaun hala’o hela misaun apoia umanitária iha Ukrania.

Almério Lopes, fó hela asisténsia médiku no apoia hahán ba labarik sira ne’ebé presiza. Imajen/Espesiál.

“Bainhira ha’u too iha fronteira entre Polandia no Ukrania, ha’u kontaktu kedan ha’u nia kolega-sira hosi Portugál ne’ebé durant halo hela misaun iha Ukrania no sira mai kedan foti ha’u ho karreta tama bá territóriu Ukránia,” nia afirma.

Durante semana rua ona, Timoroan ne’e hela iha kapitál Kyiv, Ukráina, hodi, halo ona atividade apoia umanitária ba Militár no povu Ukráina sira ne’ebé funu hasoru militár Rúsia iha liña frente.

“Maski ho kapasidade ne’ebé naton, ha’u tenke halo netik buat ruma, hodi tulun ita nia maluk sira iha Ukránia, hanesan mós ita nia nasaun uluk iha okupasaun ilegál povu Ukrania balun bá ajuda ita”, nia akresenta.

Nia hatutan, “Ha’u tama iha Ukráina, ho ha’u nia hakarak rasik, maibé hanesan membru Saúde ba Ema Hotu (SABEH). Tanba buat ne’ebé ha’u hatene hodi salva ema nia moris liuhosi primeiru sukoru ne’e, ha’u aprende hosi SABEH. Nune’e ha’u bá ne’ebé de’it sempre lori SABEH,” Almério afirma.

Tanba ne’e, Nia konsidera ninian-prezensa iha Ukránia reprezenta espíritu boot hosi voluntáriu SABEH nian hotu ne’ebé aprende iha Timor-Leste.

“Ha’u fi’ar kolega voluntáriu iha SABEH iha vontade hotu atu mai apoia povu Ukráina, maibé laiha oportunidade. Tanba ne’e, ho imi hotu nia orasaun hamutuk ho ha’u iha ne’e, ha’u nafatin hatudu servisu ne’ebé di’ak hodi reprezenta sira (voluntáriu SABEH) no Timoroan hotu,” nia fiar.

Timoroan ne’e hala’o atividade hanesan lori lojístika, hahán, aimoruk no sasán seluk tan ne’ebé mak soldadu militár no povu presiza tanba reziste maka’as iha liña oin.

“Ha’u ho kolega voluntáriu sira halo apoia umanitária ba soldadu militár no povu sira ne’ebé hetan kanek tanba tiru hosi militár Rúsia atu evakua ba ospitál no fatin seguru hodi hetan tratamentu saúde,” nia akresenta.

Almério Lopes, fó hela asisténsia médiku ba sidadaun Ukráina ne’ebé presiza. Imajen/Espesiál.

Ho serbisu umanitária ne’e, nia afirma autoridade no povu Ukráina kontente simu no agradese ba Estadu Timor-Leste tanba nasaun ki’ik, maibé bele ona ajuda sira iha situasaun difisil ne’e.

Dadaun ne’e, situasaun iha Ukránia komesa difisil liután tanba ai-hán komesa menus bá povu Ukrania no Rúsia mós kontinua tiru míssil ba territóriu Ukráina-nian.

“Ha’u mai ne’e konsiénsia klaru ona, tanba hatene ona katak risku boot tebes, risku ne’e la’ós tiru malu ho kilat musan, maibé militár Rúsia sira tiru míssil hosi ró funu nian. Nune’e, ha’u prontu simu konsekuénsia karik ida ne’e mak ha’u nia distinu hosi Maromak fó ona mai ha’u tanba distinu hosi Maromak ita bele mate iha área konflitu ka funu no área seguru, maibe la lakon vontade no espiritu kontinua apoia umanitaria” nia akresenta.

Ho situasaun difisil ne’e, Almério Lopes husu ba líder nasionál no povu Timor-Leste atu hametin unidade hodi hakribi konflitu ka funu tanba haterus povu inosente sira.

Notísia relevante: PM Taur manifesta solidaridade ba povu Ukráina

Jornalista: Hortencio Sanchez   

Editór       : Florencio Miranda Ximenes

iklan
iklan

Leave a Reply

iklan
error: Content is protected !!