HEADLINE, JUSTISA, MUNISÍPIU, OÉ-CUSSE (RAEOA)

CAC sensibiliza Lei MPCC iha RAEOA

CAC sensibiliza Lei MPCC iha RAEOA

CAC hasa'e koñesimentu ajente estadu nian iha RAEOA hodi prevene no kombate korrupsaun. Imajen Tatoli/Abílio Elo Nini.

OÉ-CUSSE, 06 jullu 2022 (TATOLI) – Komisaun Antí Korrupsaun (CAC, sigla portugés), kuarte ne’e hala’o sensibilizasaun lei númeru 7/2020 kona-bá lei Medida Prevensaun no Kombate Korrupsau MPCC, sigla portugés) ba ajente públiku sira iha Rejiaun Administrativa Espesiál Oé-Cusse Ambeno (RAEOA) hodi prevene korrupsaun.

Durante sensibilizasaun lei númeru 7/2020 kona-bá medida prevensaun kombate Korrupsaun, aprezenta mós nosaun no ámbitu kobertura lei medida prevensaun kombate korrupsaun, rejime rendimentu deklarasaun bens no interese, komposta hosi objetu, medida prevensaun no kombate korrupsaun.

Notísia relevante: CAC hahú halo ona sensibilizasaun kona-ba Lei MPCC

Nune’e mós dispozisaun krime penál, dispozisaun finál no tranzitóriu inklui lei ba medida medida prevensaun no kombate korrupsaun hamutuk artigu 117.

Komisáriu CAC, Sergio Hornai, informa, objetivu prinsipál iha atividade ne’e, atu halo konsolidasaun di’akliu-tán ba dezenvolvimentu iha setór oinoin tantu iha nivél nasionál no RAEOA.

Tanba CAC nu’udar órgaun polísia kriminál ne’ebé mak halo polítika ba iha medida sira prevene ba iha kombate kriminál no korrupsaun tenki alerta nafatin ba iha públiku, nomoos nafatin halo akonsiliasaun ba autoridade sira, tanba hirak-ne’e maka hakat daudaun ba kontinuidade dezenvolvimentu, labele dependénsia ba ema ida, maibé hotu-hotu tenke sai hanesan na’in ba iha dezenvolvimentu.

“Hirak-ne’e hotu sai hanesan responsabilidade boot ba CAC nian, ne’ebé mai ho natureza rua, primeiru halo esforsu iha polítika sira oinoin, atu Timor-Leste nia administrasaun públika bele hetan espasu ida-ne’ebé hetan rekoñesimentu iha komunidade ho integridade ida aas, governasaun ida di’ak, transparánsia no akuntabilidade halo distribuisaun kapitál Orsamentu Jerál Estadu (OJE) nian ho loloos,” Sergio Hornai, ko’alia iha salaun administrasaun Oé-Cusse.

Komisáriu ne’e hatutan, buat sira ne’e hotu laiha tán razaun seluk para ema ida atu foti no hasees orsamentu ne’e ba iha interese pesoál no individu.

“Entaun iha prevensaun ita hatete, zero toleránsia ba iha aktu sira hanesan ne’e. Ita fó biban ba iha administrasaun ida-ne’ebé di’ak,” nia fó hanoin.

Reprezentante Prezidente Autoridade RAEOA, José Eta, atuál Sekretáriu Rejionál ba Asuntu Agrikultura, agradese ba CAC tanba tulun RAEOA liuhosi sensibilizasaun lei sira kona-bá medida prevensaun kombate korrupsaun, inklui rekolla lista arolamentu nomoos deklarasaun ba rendimentu moveis no interese ba ajente sira iha rejiaun ne’e.

“Nu’udar autoridade agradese tebes, tanba ne’e oinsá asegura dezenvolvimentu ho sustentavél transparánsia akuntavél, nune’e ita bele asegura,” nia orgullu.

Nia informa, iha tinaan kotuk RAEOA hahú integra ona iha portál transparánsia liuhosi sistema free and balance, tanba foka liu oinsá dezenvolve ema, nune’e bele garantia dezenvolvimentu, aliende mós RAEOA integra mós iha Unidade Planeiamentu Monitorizasaun no Avaliasaun (UPMA).

Iha biban ne’e, Diretór Unidade Planeiamentu Monitorizasaun no Avaliasaun RAEOA, Marcos Seo, orgullu ho prezensa CAC iha Oé-Cusse, tanba bele informa ona rekizitu atu deklrara rikusoin nomoos regulamentu nu’udar ajente administrasaun públiku.

Notísia relevante: Lei MPCC sei vigora iha loron 180 hafoin publikasaun

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!