iklan

NASIONÁL, DESPORTU, HEADLINE

Kopa AFF U-19, TL “dere” Singapura 1-0

Kopa AFF U-19, TL “dere” Singapura 1-0

DILI, 05 jullu 2022 (TATOLI)- Ekipa futeból  Timor-Leste Under 19 (U-19) mane, tersa kalan ne’e, iha Estádiu Binan Football Jakarta-Indonézia, susesu iha jornada segundu kopa ASEAN Football Federation (AFF) bainhira “dere” adversáriu Singapura ho eskore 1-0.

Bainhira minutu primeiru hahú ekipa rua Timor-Leste no Singapura lansa kedan kontra no atake ba malu tuir  tékniku no abilidade ekipa ida-idak nian oinsá atu buka hatama golu hodi hetan vitória.

Ekipa Lafaek ne’ebé lidera hosi treinadór Timoroa, Eduardo Pereira, hatudu jogu ne’ebé brillante no domina bola, maibé sorte mak seidauk tur metin.

La’ós Timor-Leste deít mak halo presaun, maibé Singapura mós halo presaun  ne’ebé  makaas. Maibé defeza Timor-Leste konsege salva bola barak iha área perigozu nia laran.

Ho kontra atake ne’ebé makas durante minute 45 nia laran, laiha  ekipa ida mak prodús golu ruma atu muda rezultadu ne’ebé iha, ho nune’e rezultadu mantein ho 0-0.

Hakat ba segunda parte ekipa rua nafatin mantein ritmu jogu, maibé estratéjia ekipa ida-idak nia hodi halo mudansa liuliu iha liña ninin no klaran.

Ho mudansa ne’ebé iha fó kbiit liu ba Timor-Leste tanba iha minutu-58 bola barullu iha liña oin Singapura nian halo defeza ladun antisipa jogadór Timoroan Mario “Mbape” (17) uza oportunidade les kedan golu ida ba Singapura nakfilak rezultadu ba 1-0.

Rezultadu ne’e hanesan rezultadu permanente too minute termina laiha tan golu ruma mak akontese ba ekipa rua, hodi fó biban ba Timor – Leste iha direitu absoluta ba pontu tolu iha tabela klasifikasaun provijoriu.

Iha Grupu B, Timor-Leste okupa iha pozisaun da-haat ho  pontu tolu, enkuantu da-huluk mak Laos ho pontu tolu, Malazia pozisaun da-ruak ho pontu tolu, Kamboja ho pontu tolu iha pozisaun da-toluk no Singapura iha pozisaun ikus liu ho pontu zero.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!