iklan

HEADLINE, MUNISÍPIU, OÉ-CUSSE (RAEOA), SEGURANSA

PNTL Oé-Cusse halo apreensaun ba karreta ualu no motorizada 65

PNTL Oé-Cusse halo apreensaun ba karreta ualu no motorizada 65

Komandante Tránzitu RAEOA, Inspetór Yoseph Sani Koa, komanda hela motorista sira iha atividade pasa-revista. Imajen Tatoli/Abílio Elo Nini.

OÉ-CUSSE, 07 jullu 2022 (TATOLI) – Polísia Nasionál Timor-Leste (PNTL) iha Rejiaun Administrativa Epsesiál Oé-Cusse Ambeno (RAEOA) halo apreensaun ba karreta ualu no motorizada 65 tanba kontra dekretu-lei kódigu estrada.

PNTL enklave hala’o pasa-revista ne’e bazea ba dekretu-lei númeru 6/2003 kona-ba kódigu estrada nian, nune’e iha loron-kinta ne’e Servisu Unidade Tránzitu iha RAEOA, lideradu Komandate Tránzitu, Inspetór Yoseph Sani Koa, halo apreensaun ba transporte hamutuk 73 liuhosi atividade pasa revista.

Komandante PNTL RAEOA, Superintendente Xefe, Mateus Assunção Mendes, esplika, transporte 73 ne’e komposta hosi karreta ualu (8), motorizada hamutuk 65, ba transporte karreta ualu ne’e komposta hosi mikrolete haat (4) avansa ida no truk tolu (3).

Nia informa, daudaun ne’e unidade neen mak selu ona no hela rua, ba motorizada unidade 28 mak selu ona, hela 38 mak seidauk, nune’e totál orsamentu ne’ebé rekolla iha atividade auto-stop ne’e hamutuk $837.00, mak kontribui ona ba kofre Estadu.

Nia afirma, tipu infrasaun ne’ebé transporte sira komete mak hanesan, karta kondusaun liu prazu hamutuk sia, data inspesaun liu prazu hamutuk 26, la lori dokumentu viatura 15, no kontra orden autoridade tránzitu ida.

“Pasa-revista ida-ne’e bazea ba orden ne’ebé komandu hasai iha 12 juñu, ne’ebé molok komandu fó orientasaun ba iha públiku, mais komandu hala’o uluk iha ninia membru sira, hodi identifika sira-nia transporte karreta no motorizada, karik la kompletu tenke submete ba lei tránzitu nian, entaun ohin ha’u hasai despaxu ba tránzitu atu kontrola seguransa rodaviáriu iha territóriu Oé-Cusse,” Mateus Mandes, hateteten iha kuartél PNTL Oé-Cusse.

Komadante ne’e fundamenta, atividade pasa-revista sei iha kontinuasaun, ohin ne’e hanesan faze dahuuluk maibé ne’e segredu PNTL nian ne’ebé kaléndariu ba atividade pasa-revista sei la fó-sai públiku, tanba lei fó dalan atu realiza iha kualkér tempu.

“Ne’ebé ha’u husu ba komunidade sira, liuliu ba kondutór tantu motorizada no karreta, primeiru tenke asegura dokumentu no asesór tenke kompletu, daruak tenke asegura kondisaun transporte di’ak bele halo sirkulasaun iha públiku tanba kondisaun ne’e bele afeta ba ema-nia vida,” nia fó hanoin.

Tuir observasaun Agência Tatoli katak, atividade pasa-revista ne’e hala’o iha sub-rejiaun Pante Makasar iha suku Costa iha área estrada públiku hosi diresaun administrasaun Numbei tún ba Bundaran merkadu tradisionál Numbei kontinua to’o Palaban tasi-ibun, perténsia ba aldeia Sanane nian.

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!