DILI, 11 jullu 2022 (TATOLI) – Ekipa futeból selesaun nasionál Timor-Leste under 19 (U-19) obrigadu tenke elemina ona hosi jogu Sudeste Aziátiku (ASEAN) Football Federation (AFF) U-19 2022, iha grupu B.
Ekipa ho naran esimadu Lafaek U-19 termina jogu kontra Kamboja, iha Estádiu Nasionál Jakarta-Indonézi, segunda kalan ne’e, ho eskore 4-1.
Notísia relevante: Kopa AFF U-19, TL “dere” Singapura 1-0
Maski, Ekipa Timor-Leste ne’e mánan Kamboja, maibé labele ultrapasa ba semi-finál tanba foin rekolla pontu neen, Enkuantu iha jogu dala-haat, ekipa Malázia konsege rekolla pontu hitu, Laos hetan pontu sia iha jogu dala tolu no Kamboja hela ho pontu zero.
Nune’e, Ekipa Malázia ho Laos mak iha direitu absoluta hodi avansa ba semi-finál hodi kontra grupu seluk iha Kopa AFF U-19, tinan 2022.
Timor-Leste derrota iha kopa AFF U-19, maibé hatudu jogu ho dignidade nu’udar timor-oan hodi reprezenta Bandeira Repúblika Demokrátika Timor-Leste (RDTL) hodi joga tuir de’it regra futeból.
Iha minutu dahuluk, hahú ekipa rua lansa kedan kontra no atake ba malu tuir tékniku no abilidade ekipa ida-idak nian atu buka hatama golu.
Esforsu hirak ne’e, la hela deít hanesan istoria tanba jogadór timor-oan halo presaun ba Kamboja ho makas tebes, nune’e iha minutu 26, jogadór Zenivio Mota (11) loke golu primeiru hodi muda rezultadu ba 1-0.
Golu ne’e halo Kamboja nia mentalidade tun hodi halo presaun, ho nune’e liu de’it minutu tolu ba minutu 29, jogadór Olagar Malik responde tan golu ida dudu rezultadu ba 2-0.
Golu ne’e, hanesan golu ikus ba ekipa rua tanba laiha tan golu ruma mak akontese ba ekipa rua no Timor-Leste provizóriu lidera jogu.
Hakur ba parte daruak, ekipa rua nafatin matein hodi hatudu jogu ne’ebé brillante hodi hala’o kontra no atake ne’ebé iha, Timor-Leste halo fallansu ida iha liña klaran, nune’e jogadór Kamboja utiliza oportunidade hodi lansa kedan golu ida hosi jogadór númeru kamizola 10 iha minutu 61 hodi muda rezultadu ba 1-2.
Golu ne’e, halo jogadór Timor-Leste nian la nonok de’it, maibé nafatin esforsu atu hatama tan golu to’o ikus, konkista duni vitória tanba iha minutu 81, jogadór Luis Ribeiro, lansa golu ida hodi hado’ok rezultadu ba 3-1.
Minutu la’o ba bebeik no jogu kontinua manas, maibé ekipa Timor -Leste siak tan deít hodi la fó valda ba ekipa adversáriu, tanba iha minutu 90+1, jogadór Luis termina golu ikus taka ho rezultadu ho 4-1.
Notísia relevante: Falla iha defeza, Timor-Leste derrota iha Kopa AFF U-19
Jornalista: Hortencio Sanchez
Editór : Florencio Miranda Ximenes
