DILI, 12 jullu 2022 (TATOLI)—Deputada PLP iha Parlamentu Nasionál, Domingas dos Santos, kestiona kompañia Bobolai ne’ebé distribui produtu Cesta Bázika ne’ebé “fuhuk” ba komunidade iha suku Ritabou, postu administrative Maliana, munisípiu Bobonaro.
Notísia Relevante: Governu lansa distribuisaun Cesta Bázika faze daruak iha aldeia Baia Leste
Deputada hosi bankada Governu ne’e apresia programa VIII Governu Konstitusionál nian ba iha programa Cesta Bázika ne’ebé bele ajuda tebes povu hosi despeza família no bele hasa’e produsaun lokál, miabé nia parte lament aba emprezáriu Bobonaro balun nia attitude ne’e.
“Hanesan Bobonaro oan lamenta tebes ho kompañia Bobolai hanesan emprezáriu Bobonaro-oan ne’ebé foin dadaun iha sesta (08 jullu) ne’e fahe Césta Bázika iha suku Ritabou, postu Maliana ne’ebé komunidade kestiona tebes ho sasán Césta Bázika tanba produtu ne’e hanesan forumungu, kotu ne’e “fuhuk” hotu depois modo mós aat,” Deputada Bobonaro-oan ne’e levanta iha plenária Parlamentu Nasionál, tersa ne’e.
Ho nune’e, nia husu ba emprezáriu sira-ne’ebé hetan fiar hosi Governu hodi fornese Cesta Bázika ba komunidade atu garante nafatin kualidade produtu.
“Governu hakarak ajuda fasilita maibé emprezáriu sira halo buat ne’ebé aat iha ne’eba tanba ne’e iha loron ne’e kedas bainhira sira telefone ha’u, no ha’u halo konfirmasaun ho ekipa ne’ebé mak halo monitorizasaun iha mós jornalista RTTL, E.P halo koobertura iha ne’eba no daudaun parese viral ona tanba produtu hirak ne’ebé fahe “fuhuk” no aat. Komuidade lakohi simu,” nia hateten.
Deputada ne’e rekomenda ba Governu atu tau atensaun másimu bainhira empreza ne’ebé kontinua la kumpre ne’e hapara tiha kontratu.
“Ne’ebé, ho emprezáriu sira-ne’e rekomenda ba Governu tau atensaun másimu. Karik sira-ne’ebé mak halo sala tau tiha black list ba, lalika haruka sira fahe tan sasán sira hanesan ne’e,” nia dehan.
Aleinde ne’e, Deputadu CNRT, José Virgílio, hakarak husu ba iha ministeriu relevante tanbasá komunidade balun iha suku Comoro, Dili, dezde inplementa programa Cesta Bázika primeiru no daruak kontinua seidauk hetan.
“Iha suku Comoro, aldeia Fomento 2 hahú hosi implementa Cesta Bázika primeiru to’o agora la fahe ba uma-kain 35, ida ne’e halo diskriminasaun. Nune’e mós agora tama ba iha implementasaun Cesta Bázika segundu faze, aumenta tan ema na’in-100 mak la hetan,” nia hateten.
Nia dehan, tuir informasaun ne’ebé iha uma-kain ida iha aldeia Fomentu 2, iha família uma laran na’in-ualu (8) ka sia (9) no balun iha na’in-lima maibé realidade simu sasán Cesta Bázika iha ema na’in-rua de’it mak simu, tanba ne’e sira sente lamenta tebes.
“Nune’e, husu ba ministériu relevante ka kompañia ne’ebé distribui Cesta Bázika tenke fahe sasán tuir kada ema ida to’o dolar $50,” nia sujere.
Hatán ba preokupasaun ne’e, Governu liu hosi Ministru ba Asuntu Parlamentár no Komunikasaun Sosiál (MAPKOMS), Francisco Jeronimo, hateten rejista hela sei hato’o ba ministéiru relevante hodi fó resposta.
Jornalista : Nelson de Sousa
Editór : Cancio Ximenes
