PR Horta: “Adezaun Timor-Leste ba ASEAN sai prioridade nasionál”
DILI, 12 jullu 2022 (TATOLI)— Prezidente Repúblika, José Ramos Horta, konsidera adezaun Timor-Leste adere ba organizasaun Sudeste Aziátiku (ASEAN) hanesan prioridade nasionál, nune’e Estadu tomak halo ona esforsu iha tinan 10-resin ona.
“Ita nia esforsu tama ba ASEAN ne’e dezde 2011 atu Timor-Leste bele tama iha ASEAN ne’e prioridade nasionál ida, maibé ekipa ida koordena hosi Ministériu Negósiu Estranjeiru no Kooperasaun (MNEK) serbisu maka’as hela atu ita bele adere lalais,” Xefe Estadu, hateten ba jornalista-sira iha edifisiu MNEK Dili, tersa ne’e.
Xefe Estadu observa durante tinan hirak liu nia laran prosesu hotu la’o di’ak tanba ekipa sira estabelese másimu ho kompeténsia téknika metin tebes.
“Observadór ka ekipa delegasaun sira mai ne’e kontente ho Timor-Leste nia preparasaun atu adere ba ASEAN nian,” PR Horta afirma.
Alende ne’e, Horta dehan preparasaun Timor-Leste nian atu adere ba Organizasaun Mundiál Komérsiu (OMK) la’o diák tebes tanba ekipa ne’ebé lidera hosi Ministériu Koordenadór Asuntu Ekonomika (MKAE) halo esforsu no serbisu maka’as atu adere ba OMK.
“Ita nia adezaun ba OMK importante tebes, ida ne’e prioridade nasionál mós ba Timor-Leste atu tenke adere ba tanba ida ne’e organizasaun mundiál kona-bá komérsiu nian. Ita tenke tama no prosesu hela uitoan de’it ona,” nia afirma.
Tuir nia vantajen hosi organizasaun rua ne’ebé Timor-Leste luta hela atu tama mak bele ajuda no hadi’a ekonomia nasaun nian.
“Vantajen ba ita mak ne’e tama iha ASEAN ekonomia rejionál ida ema rihun 700 ho ekonomia hosi produtu internu brutu hamutuk trilliun $4 resin, signifika Timor -Leste tama bele fasilita atrasaun investedór lubuk ida iha mundu atu mai investe, maibé Timor – Leste tenke prepara aan ho buat hotu ne’ebé regula investimentu iha terra no propriedade no seluk tan,” Xefe Estadu afirma.
Notísia relevante:PR Horta otimista Timor-Leste sei adere ba ASEAN
Jornalista: Hortencio Sanchez
Editór : Florenco Miranda Ximenes
