iklan

EDUKASAUN, HEADLINE, MUNISÍPIU, OÉ-CUSSE (RAEOA)

RAEOA destaka profesór 58 reforsa ensinu aprendizajen

RAEOA destaka profesór 58 reforsa ensinu aprendizajen

Edukasaun RAEOA dezloka profesór 58 hodi reforsa ensinu aprendizajen iha eskola. Imajen Tatoli/Abílio Elo Nini.

OÉ-CUSSE, 12 jullu 2022 (TATOLI) – Diresaun Rejionál Edukasaun Juventude no desportu Rejiaun Administrativa Espesiál Oé-Cusse Ambeno (RAEOA), tersa ne’e destaka profesór foun hamutuk na’in-58 ba eskola sira iha teritóriu Oé-Cusse hodi reforsa ensinu aprendizajen iha rejiaun ne’e.

Sekretária Rejionál ba Asuntu Edukasaun Solidariedade Sosiál, Avelina da Costa, hatete, funsionáriu hirak-ne’e rekrutadu iha tinan ne’e atu responde preokupasaun eskola sira-ne’ebé enfrenta problema profesór, nune’e nia espera ho prezensa profesór foun hirak-ne’e bele halo mudansa hodi hasa’e kualidade edukasaun iha rejiaun ne’e.

“Ohin ba oin ita-boot sira sei dezloka ba eskola idak-idak tuir nesesidade ne’ebé iha, tán ne’e hanesan funsionáriu foun tenke hatudu espíritu foun ba mudansa, tanba durante ne’e iha eskola barak mak menus profesór entaun imi ba atu apoiu hodi reforsa tán prosesu aprendizajen iha eskola,” Avelina da Costa ko’alia iha salaun edukasaun Oé-Cusse.

Nia husu atu hatudu prestasaun serbisu implementa siénsia ne’ebé aprende ona iha nível akadémiku idak-idak, nune’e bele oferese siénsia ho kualidade ba oan sira, tanba rekutadu ba ema na’in-58 ne’e maioria nível edukasaun.

“Tempu ona atu bele oferese ita-nia matenek ne’ebé simu ona, ita tenke fahe ona liuhosi kna’ar manorin nu’udar edukadór,” nia fó hanoin.

Diretór Interinu Edukasaun RAEOA, João Boquifai, husu atu kria amizade iha ambiente eskola entre profesór, estudante no inan-aman ho entidade relevante sira.

“Bainhira imi to’o fatin idak-idak tenke kria amizade ho alunu, inan-aman no profesór sira-ne’ebé hanorin ona iha eskola ne’e, ka hasoru maluk profesór balu hosi eskola seluk tenke kria amizade, tanba ita-nia kna’ar funsaun hanesan manorin, no labele konsidera komunidade iha eskola sira hanesan ita-nia inimigu, atu lori oan sira mai eskola,” nia katak.

Nia informa, funsionáriu foun 58 ne’e edukasaun kontrata sira durante fulan-neen to’o dezembru tinan ne’e, karik la kumpri orden no kna’ar tuir edukasaun nian, maka sei rejista iha avaliasaun dezempeñu hodi submete ba prosesu kontinuasaun ka hapara, tanba durante iha prosesu aprendizajen inspetór edukasaun sei kontinua halo monitorizasaun.

Nia fó sai katak, profesór na’in-58 dezloka ba Ensinu Primária (EP), Ensinu Bázika Sentrál (EBC, sigla portugés), no Ensinu Bázika Filiál (EBF) hamutuk na’in-36, no profesór ba Enisnu Sekundária no Tékniku vokasionál hamutuk na’in-22.

Entretantu, totál eskola Ensinu Sekundáriu Jerál iha RAEOA hamutuk hitu (7) Tékniku Vokasionál Tolu (3) Ensinu Básiku 74, no ensinu pré-eskolár hamutuk (16) totál eskola iha RAEOA hamutuk 123 no totál númeru estudante ne’ebé alistadu 51.246.

Nune’e totál profesór iha Rejiaun Administrativa Espesiál Oé-Cuse Ambeno hamutuk na’in-869, komposta hosi parmanente na’in-450 no kontratadu hamutuk 369.

Notísia relevante: RAEOA loke konkursu rekruta profesór na’in-58

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!