DESPORTU, HEADLINE, MUNISÍPIU, OÉ-CUSSE (RAEOA)

Arsénio Bano abertura Kopa ZEESM ba klubu 98

Arsénio Bano abertura Kopa ZEESM ba klubu 98

PA RAEOA, abertura Kopa ZEEMS ba klubu 98 hodi promove talenta desportiva. Imajen Tatoli/Abílio Elo Nini.

OÉ-CUSSE, 13 jullu 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kuarta ne’e abertura Kopa Zona Ekonomia Espesiál Sosiál Merkadu (ZEESM) ba klubu 98, hodi promove talenta desportiva ba foinsa’e sira iha rejiaun ne’e.

Prezidente Autoridade RAEOA, Arsénio Paixão Bano, orgullu tanba tinan ne’e hahú reativa ho objetivu hanesan atividade desportu atu promove talentu foinsa’e sira ba desportiva nu’udar fini ba futuru reprezenta rejiaun ne’e hodi kompete iha eventu nasionál.

Autoridade RAEOA abertura Kopa ZEESM. Imajen Tatoli/Abílio Elo Nini.

“Kopa ZEESM ita hahú iha 2015 to’o 2017, no iha 2018 tanba eleisaun antesipada, iha 2019 to’o 2021 la realiza tanba pandemia COVID-19, tinan ida-ne’e mak autoridade deside reativa fali, atu komemora loron aniversáriu kriasaun RAEOA-ZEESM TL ba dala-ualu, ne’ebé maka Governu Sentrál fó podér mai Oé-Cusse Ambeno,” Arsénio Bano, ko’alia iha serimónia abertura, ne’ebé realiza iha kampu foteból Oébau, Oé-Cusse.

Nu’udar prezidente autoridade RAEOA, enkoraja jogadór sira atu hatudu disiplina no kria amizade, iha jogu la’ós atu manán de’it prémiu maibé presiza hatudu talentu, nune’e iha futuru karik eventu nasionál iha, bele sai selesaun reprezenta Oé-Cusse kompete iha nivél nasionál.

“Tinan ne’e ita hahú ona, ne’ebé ba oin ita sei hadi’a di’akliu tán presiza servisu hamutuk ho ekipa Asosiasaun Futeból Oé-Cusse (AFO), hodi kontinua dudu joven sira ba desportu, Oé-Cusse tenke ba oin labele izoladu beibeik, tenke kria atividade barak atu anima komunidade no joven-sira,” nia promete.

Vise-Prezidente Komisaun Organizadora, Armindo Talue, informa, modalidade desportu integra iha Kopa ZEESM ne’e iha tolu, komposta hosi voleiból feto mane, futeból salaun feto mane, ba futból iha klubu 30, voleiból mane iha klubu 27, feto klubu 16, futiból salaun mane iha klubu 16, feto hitu, ne’ebé hamutuk 98 klubu.

Nune’e fonte orsamentu ba Kopa ZEESM ne’e hamutuk rihun $35, ne’ebé aloka hosi Orsamentu Jerál Estadu (OJE) 2022 nian.

Iha abertura Kopa ZEESM ne’e jogu dahuluk hosi modalidade futiból, jogu primeiru jogadór sira hosi klubu Kmanek Hau-Ana hasoru ekipa jogadór São João Batista, ne’eb’e lidera hosi árbitru, Rodrigu Teixeira, asistente dahuluk, João Boscu Auni, asistente daruak, Benditu da Conceição.

Notisia relevante: RAEOA reativa Kopa ZEESM promove talenta foinsa’e sira

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!