RAEOA finaliza ona projetu Uma Kbiit Laek faze dahuluk
OÉ-CUSSE, 13 jullu 2022 (TATOLI) – Diretór Programa Nasionál Dezenvolvimentu Suku, Rejiaun Administrativa Espesiál Oé-Cusse Ambeno (RAEOA), Sebastião Tanesi, fó-sai katak, ezekusaun ba projetu Uma Kbiit Laek (UKL) faze dahuluk ba unidade 36 iha rejiaun konklui ona tanba atinje ona 100%.
“Iha 2021 Governu liuhosi MAE fó projetu UKL ba Oé-Cusse hamutuk unidade 36 ba suku 18 iha aldeia 18, agora nia ezekusaun ba progresu hotu-hotu remata ona 100%, ne’ebé agora ita prepara fali ba implementasaun UKL faze daruak nian,” Sebastião Tanesi, hatete iha Oé-Cusse, kuarta ne’e.
Nia fó-sai katak, hosi unidade 36 ne’e, suku 16 maka PNDS hamutuk ho autoridade RAEOA entrega ona ba benefisiáriu sira atu uza, hela de’it suku Lela-Ufe iha sub-rejiaun Nítibe no suku Taiboko iha sub-rejiaun Pante Makasar.
“Tuir loloos ita entrega hotu ona maibé benefisiáriu sira mak adia tanba sei iha preparasaun inaugurasaun, maibé ita konfirma ona katak iha kinta aban, 14 jullu, ita sei entrega uluk Lela-Ufe nian no segunda semana oin entrega tán Taiboko nian atu ensera ona faze primeiru ninian,” nia katak.
Iha tinan fiskál 2021 Governu harii Uma Kbiit Laek hamutuk unidade-1.254 iha suku 424 iha teritóriu nasionál ho montante orsamentu $25,000.000 ho kustu ba kada uma purvolta $14,000 to’o $17,000.
Purtantu, projetu Uma Kbiit Laek, ne’ebé konstrui komposta hosi modelu rua, modelu 48 m2, inklui kuartu tolu (3), sala vizíta ida (1) no dapúr ida (1), modelu 37 m2 inklui kuartu rua (2), sala vizíta ida (1) no dapur ida (1).
Nune’e iha RAEOA medida konstrusaun UKL la hanesan, balun 48 m2 no balun 37 m2, no totál orsamentu ne’ebé Governo Sentrál liuhosi Ministériu Administrasaun Estatál (MAE) aloka ba UKL unidade 36 iha Oé-Cusse hamutuk $611,296.00.
Jornalista : Abílio Elo Nini
Editór : Evaristo Soares Martins
