DESPORTU, DILI, HEADLINE

Romário Tety sai asistente árbitru dahuluk iha kopa AFF U-19

Romário Tety sai asistente árbitru dahuluk iha kopa AFF U-19

Timoroan Romario Tety (iha marka azul) sai asistente árbitru dahuluk iha kopa AFF U-19 2022, iha Jakarta-Indonézia. Imajen/Espesiál

DILI, 13 jullu 2022 (TATOLI)– Timoroan ho naran Romário Tety, hetan fiar hosi ASEAN Football Federation (AFF), hodi sai asistente árbitru dahuluk no segundu iha kopa AFF Under-19 (U-19) 2022, ne’ebé realiza iha Jakarta Indonézia.

“Desizaun ne’e mai hosi Refree Development Officer (RDO) mak husu ita nia asistente árbitru ne’e bá, maibé iha ne’ebá nia konsege hatudu rezultadu di’ak no hetan valór ne’ebé di’ak,” Diretór Arbitrajen Federasaun Futeból Timor-Leste (FFTL), Nivio da Costa Fernandes ba Agência TATOLI iha edifisiu FFTL, kuarta ne’e.

Iha eventu rejionál ne’e, Romário konsege tun dala haat hanesan abertura AFF ne’ebé ekipa Myanmar kontra Brunei Darusalam, hanesan segundu asistente árbitru, ho prestasaun ne’ebé brillante.

Iha jogu daruak, entre ekipa Vietname kontra Filipina, Timoroan ne’e hetan tan konfiánsa sai hanesan asistente árbitru dahuluk. Enkuantu  jogu entre ekipa Indonézia kontra Vietname sai asistente árbitru dahuluk no jogu ikus Tailándia ho Vietname, Romário nafatin mantein iha pozisaun hanesan asistente árbitru dahuluk.

“Ita nia árbitru tun de’it iha jogu faze grupu no hakat ba semi-final ne’e komisaun jogu prefere utiliza de’it árbitru antigu AFF nian, nune’e Romário sei fila iha tempu besik,” nia afirma.

Nia dehan, foin dahuluk árbitru timoroan ida lidera jogu iha rai li’ur, ne’e sai orgullu ida ba Timor-Leste.

“Durante ne’e ema barak duvida ho árbitru timoroan liuliu ba desizaun ne’ebé sira foti  iha jogu, maibé Romário ba lidera jogu rejionál ida ne’ebé ho nia desizaun loos no ema hotu halo analiza ba nia desizaun ne’ebé tuir regra ne’ebé iha. Agora Romário sai hanesan referénsia ida katak desizaun ne’ebé sira foti la’ós sala, maibé tuir realidade no regra ne’ebé iha,” nia kongratula.

Romário hanesan árbitru ne’ebé ho lisensa sertifikadu A hosi AFF nian hamutuk ho árbitru prinsipál ida mak Pedro Maia Carvalho.

FIFA halo pedidu ba FFTL atu delega árbitru prinsipál, Pedro Maia Carvalho,maibé  trata hela atividade ida iha Timor-Leste, nune’e FFTL propoin Romário hodi sai asistente árbitru ba iha jogu  AFF U-19 2022.

Daudaun, Diresaun arbitrajen sei prepara hela rekursu iha tinan ne’e, atubele tuir tan formasaun ba lisensa A nian  hodi sai hanesan árbitru ba ASIAN Football Confederation (AFC) nian.

Tuir dadus ne’ebé iha árbitru iha Timor-Leste hamutuk 567, hosi númeru ne’e lisensa A na’in- rua, lisensa B na’in-10, lisensa C na’in 60 no restu iha lisensa D.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!